Presidenti Meta ka befasuar sërish me inkoherencën e tij politike, në funksion të përplasjeve me mazhoranëcën.
Ai, gjatë takimit në tryezën për të ardhmen e Vjosës, me temë “Digat në Parkun Kombëtar”, shprehu shqetësimin e tij lidhur me ndërtimin pa kriter të hidrocentraleve në Shqipëri.
“Në këtë fazë tranzicioni mjaft kaotike dhe pa shumë përvojë në zhvillimin e qëndrueshëm të vendit prej vitit 2007 është rritur jashtëzakonisht numri i përgjithshëm i HEC-eve të ndërtuara, në ndërtim e sipër ose në plan për ndërtim.
Ekspertët sot theksojnë se nuk ka degë lumi që nuk është në proces ndërtimi apo në plan për t’u përdorur për HEC-e. Dendësia e HEC-eve është më e larta në Ballkan, gati dyfish me vendet e rajonit.
Mbi 80 HEC-e janë dhënë edhe brenda zonave të mbrojtura të vendit ose në zona që janë të mundshme për t’u mbrojtur në të ardhmen siç është rasti i lumit Vjosë”, tha kreu i shtetit.
Por kujtojmë: Meta ka qenë ministër i Energjitikës në vitet kur Berisha, në kabinetin e të cilit ai qe figurë nr.2 që nga 2010 deri në 2011 (më pas dha dorëheqje për skandalin e videos së të ndjerit Dritan Prifti), shpallte Shqipërinë si vend për të qenë superfuqi energjitike, shoqëruar kjo me dhënien e lejeve për HEC-e private në shumë lumenj të Shqipërisë. Madje dhe një shumë prej 700 mijë eurosh që përflitej në bisedën mes tij dhe Priftit në video, lidhej pikërisht me një HEC privat.
E ndërkohë, shqetësimi i Metës për HEC-et, një problematikë shqiptare gati 10-vjeçare, shprehet vetëm sot prej tij.
“Lumi Vjosa është një pasuri natyrore për vendin. Ndërtimi i HEC-eve në shkallë të gjerë dhe hapësirat jo miqësore dhe armiqësore në zonat e gjelbrta, s’mund të jetë në rrugë e blertë për zhvillimin e vendit. Shkencëtarët këmbëngulin se HEC-et shkaktojnë dëme në sipërfaqet e ujërave, deri në ashpërsimin e klimës deri në ngrohjen globale.
Shqetësim bën dhe cilësia e hartimit të raporteve për ndikimin në mjedis të HEC-eve. Ato shpesh përgatiten në tavolinë në mënyrë të shpejtë dhe shpesh miratohen ato që do qeveria dhe koncesionari. Këto ditë jam vënë në dijeni për një letër të hapur nga komuniteti europian për një shqetësim për HEC-et. Çuditërisht këto kambana nuk dëgjohen.
Shteti shqiptar duhet të ruajë vlerat e natyrës dhe të shëndetit të njeriut. Do të mbështesja ndalimin e digave mbi Vjosë dhe shpalljen e saj Park Kombëtar. Çdo qëndrim kokëfortë s’do i shërbente të ardhmes së vendit dhe rrugës drejt BE-së. Çdo shqiptar duhet të shkojë në lumin Valbonë, që është për të vënë duart në kokë me atë çka është bërë”, tha Meta, si gjithnjë me tendencën e theksuar të luftës së përditshme politike me qeverinë. /tesheshi.com/
