Operatori i Shpërndarjes së Energjisë Elektrike ka bërë kallëzim penal ndaj një tjetër firme private, me akuzën se ka dëmtuar kabllin e linjës Kinostudio-Lanabregas. Për pasojë, kanë mbetur pa energji elektrike rreth 40 mijë banorë të 30 fshatrave te Tiranës, si Lanabregas, Bregas, Linzë, Linzë Deli, Surrel, Priskë, Fushë Farkë, etj, Antenat e televizioneve ne Dajt, Vilat Qeveritare në Dajt, etj, si dhe subjekte të private (Teleferiku, etj).
Kryenxhinieri i Drejtorisë së Tensionit të Lartë për Tiranën, Egert Mema tha për mediat se pas konstatimit të dëmit, OSHEE ka thirrur policinë, për hetimin e ngjarjes dhe mbledhjen e provave.
“Ky është rasti i 15 për muajin dhjetor vetëm në Tiranë, pra mesatarisht çdo ditë nga një dëmtim. Kompania ka punuar jashtë rregullave të kushteve teknike, pa marrë azhornimet dhe kodet e rrjetit nga OSHEE. Abonentët po marrin energji nga linjat e tjera unazore”, u shpreh ai.
Demtimi i kabllit ndodhi nga firma private “B93”, e cila po punonte për llogari të ujësjellësit, pranë Fizikës Bërthamore, duke nxjerrë jashtë fuksionit dy N/stacionet, Lanabregasin dhe atë të Qafë-Mollës./tesheshi.com/
