Fiorentina u ka dëshmuar edhe njëherë neroazurëve se nuk janë ende gati për titull, duke u shkaktuar disfatën e radhës.
Dy skuadrat e Milanos i kanë ndërruar tashmë rolet. Milani i zhytur në krizë po sheh ditë të mira dhe rezultate pozitive, ndërsa Interi prej javësh po përjeton moment të errëta.
Kështu ka ndodhur dhe mbrëmë në Firence, në “Artemio Franchi”, ku me gjithë epërsinë e përkohshme, Interi do t’i dorëzohej dëshirës për fitore të vendasve, duke lënë tre pikë të rëndësishme.
Dueli mes Fiorentinës dhe Interit do të fillonte më mirë për miqtë, që edhe kalojnë në avantazh pas gjysmë ore lojë. Autori i golit do të ishte Brozoviç.
Skuadra vjollcë e nis më vrullshëm pjesën e dytë, dhe rezultati nuk vonon. Valero ngre stadiumin në këmbë në minutën e 60-të. 1-1!
Interi do t’i luante momentet e fundit me një lojtar më pak, pasi Telles, mbrojtësi i majtë, do të nxirrej jashtë me të kuqe.
Epërsia e Fiorentinës në numrin e lojtarëve i jep frytet në minutën e 91-të, kur Babacar do të mposhtte portierin Handanoviç. Jo të qetë, interistët nuk mundën të bëjnë asgjë më pas, duke pranuar humbjen.
2-1 për Fiorentinën mbaroi i tërë takimi, që rezervoi në fund dhe një tjetër karton të kuq për lojtarët e Interit. Kondogbia e mori atë për një duartrokitje ironike para gjyqtarit të ndeshjes.
Fiorentina pozicionohet e treta tanimë në klasifikim, me 49 pikë, shtatë më pak se Napoli i vendit të dytë, e tetë më pak se Juventusi kryesues. Interi, në të kundërt, zbret në vend të pestë, me 45 pikë. /tesheshi.com/
