Në Devoll, Peqin e Kamëz, rezultati i Partisë Socialiste në zgjedhjet e 25 qershorit ka qenë më i dobët se ai i 4 viteve më parë. Kjo u bë e ditur në mbledhjen e Asamblesë së PS-së nga sekretari i Organizimit Administrativ, Bashkim Fino, i cili paraqiti raportin e rezultateve krahasuese të dy palë zgjedhjeve të fundit, sipas qendrave të votimit.
Në dokument përfshihen 120 njësi administrative vendore dhe 383 të tjera në shkallë vendi. Në 16 bashki rezultati ka qenë 50% më i ulët, ndërsa në bashkitë Devoll, Peqin e Kamëz në të gjitha njësitë administrative janë më dobët se në vitin 2013.
Sipas këtij raporti, në shkallë vendi, rezultati ka qenë më i dobët më 25 qershor se 4 vite më parë në 1500 Organizata Socialiste nga 4894 që ka gjithsej.
Në raport thuhet se problem kryesor për këtë rezultat është fiktiviteti i strukturave dhe angazhimi i tyre.
Sipas raportit, ende ka qendra votimi që nuk mbulohen nga aktivitetet e Organizatave Socialiste, ndërsa ka struktura me minimumin e anëtarëve, 10 gjithsej. /tesheshi.com/
