Edhe pse subjektet parlamentare në Kosovë marrin hiç më pak se 4.2 milionë euro nga buxheti shtetëror brenda një viti ato nuk tregojnë mënyrën se si i shpenzojnë ato, pasi nuk publikojnë kurrfarë raporti.
Se transparenca e tyre vazhdon të jetë në nivel jo të duhur e tregon edhe një analizë e prezantuar nga Instituti Demokratik i Kosovës (KDI) mbi financimin e partive në kuadër të javës kundër korrupsionit.
Florent Spahija, nga ky Institut, ka bëtë të ditur se në vitin 2016, është PDK-ja e Kadri Veselit që ka pranuar më së shumti para nga buxheti i shtetit, gjithësejt 1 milion e 295 mijë euro, pastaj LDK-ja e Isa Mustafës 1 milion e 50 mijë euro, Lëveizja Vetëvendosje 560 mijë euro, AAK-ja 385 mijë euro, Lista Serbe 315 mijë euro dhe subjektet e tjera.
Ai ka thënë se PDK nuk ka ueb faqe dhe nuk i ka paraqitur askund shpenzimet e tyre, edhe pse KDI gjatë dy palë zgjedhjeve të fundit ka dërguar pyetësor në lidhje me buxhetin e këtij subjekti politik për shpenzimet në fushatat zgjedhore, por një asnjë rast nuk ka pranuar përgjigje.
Spahiu më tej thotë se LDK si subjekti i dytë politik që ka pranuar më shumë buxhet nga shteti, ka thënë se ka bërë publike së fundmi raportet mbi shpenzimet e atij buxheti si dhe raportet për fushatat zgjedhore për 2013 (zgjedhjet lokale) dhe 2014 (zgjedhjet nacionale).
“KDI në këtë vit ka dërguar në dy palë zgjedhje në lidhje me shpenzimet e fushatave. Për zgjedhjet nacionale KDI nuk ka pranuar pyetësorin e plotësuar, por për ato lokale LDK ka qenë e hapur dhe ka treguar se sa ka buxhet për fushatë dhe si do ta shpenzoi atë. KDI do monitoroi nëse raportim ka qenë i saktë pasi që të bëhet publik raporti financiar mbi shpenzimet e fushatës”, ka thënë Spahija.
Më tej Spahiu tha se LVV, i ka publikuar raportet financiare nga 2013 deri në 2015, por jo edhe atë të 2016.
“KDI gjatë fushatave zgjedhore të fundit, i ka dërguar LVV-së dy pyetësorët në lidhje me shpenzimet që do ti kenë në fushatë, por në asnjë rast nuk ka pranuar përgjigje në pyetësorin e dërguar”, ka potencuar Spahija.
Po ashtu ka bërë të ditur se subjekti AAK, i ka publikuar të gjitha raportet financiare nga 2013 deri në 2016 por nuk ka publikuar raportet financiare të dy fushatave zgjedhore 2013 dhe 2014.
“KDI ka dërguar pyetësorin edhe tek AAK për përgjigje se sa do të shpenzojnë në dy fushatat zgjedhore të vitit 2017, por në asnjë rast nuk ka pranuar përgjigje nga AAK”, njoftoi ai.
Gjithashtu tregoi se Lista Serbe nuk ka publikuar asnjë raport financiar nga viti 2013 dhe se KDI e ka kontaktuar dhe dërguar pyetësorin për shpenzimet e fushatës zgjedhore, por nuk ka pranuar asnjë informatë.
NISMA është subjekti tjetër politik i cili në vitin 2015 i ka bërë publike shpenzimet por jo edhe të viteve tjera.
Ai tha se KDI ka dërguar pyetësor edhe tek ky subjekt politik, dhe vetëm për zgjedhjet lokale ka marrë përgjigje se sa buxhet kanë ndarë dhe se si do të shpenzohet ai.
“Mungesa e auditimit të raporteve financiare ka qenë arsyetimi kryesor për mos publikimin e raporteve financiare që subjektet politike kanë paraqitur para publikut. Për më shumë se 4 vite Kuvendi i Kosovës nuk ka arritur të zgjedh auditorët për auditimin e financave të subjekteve politike. Këtë vit Kuvendi i Kosovës ka zgjedhur auditorët”, ka thënë Spahija.
Rekomandimi kryesor i KDI në lidhje më këtë çështje sipas tij, është që mandati i prokurimit të kompanive të auditimit duhet t’i kthehet KQZ-së, në mënyrë që pengesat politike të mos jenë arsye për vonesat e përvitshme.
“Rekomandim tjetër i KDI është që llogaritë bankare dhe pasqyrat e subjekteve politike të publikohen dhe të jenë të qasshme për publikun. KDI konsideron se duhet të sqarohen dispozitat që kërkojnë nga subjektet politike të publikojnë versionet e pa-audituara të raporteve”, ka deklaruar Spahija.
Përgatiti: Blendi Gashi – tesheshi.com
