Nga Musa Mustafa
Gjindja në Mitrovicë u gëzua aty nga 2011-ta kur morri vesh se Europa ka dhënë një dorë të mirë milionash për ndërtimin e qendrës multisportive, qendrës tregtare si dhe në rinovimin e palestrës sportive Minatori.
Afati i dorëzimit ka qenë viti 2014. Dhe, po ikën 2015, por këto objekte nuk kanë përfunduar duke hedhur dyshimin në popull se ndokush ka futur duart në fondet e dhëna, a se mos diçka tjetër që bie era korrupsion e ka penguar përfundimin e tyre.
Projekte në fjalë janë financuar nga Komisioni Evropian, me një vlerë prej mbi 23 milion euro, ku komuna e Mitrovicës ka ndarë vetëm tokën për ndërtim.
“Në qendrën multisportive ishte parapa të ndërtohej dhe një pishinë olimpike, tani ajo është kthyer në një pishinë shkollore. Qendrës tregtare iu hoq tërësisht një kat i garazheve nëntokësore, ndërsa palestra sportive Minatori që ishte paraparë të plotësoj standardet evropiane tani më ajo nuk do ti plotësojë këto kushte” ka thënë ing Faruk Mujka, ish-hendbollist, tani anëtar i asamblesë komunale të Mitrovicës.
Në anën tjetër, zyrtarë komunalë të sportit në Mitrovicë me kusht të anonimitetit kanë theksuar se këtu ka vend për nisjen e hetimeve për atë se çka ka ndodhur me këto projekte të KE-së.
Sami Zeka, drejtor i Drejtorisë për Planifikim dhe Urbanizëm i ka thënë portalit tesheshi.com se është shumë e vërtet që ka devijim nga plani fillestar i ndërtimit dhe i rinovimit të projekteve në fjalë.
Zeka nuk ka munduar të preçizojë se a ka zbritje të kostos së këtyre objekteve pas devijimit nga plani fillestar, pra mosndërtimi i pishinës olimpike, anulimi i ndërtimit të një kati të garazheve nëntokësore, si dhe mos përmbushja e standardeve të BE-së në palestrën Minatori.
Të gjitha veprimet rreth tenderit për ndërtimin e këtyre objekteve i ka bërë zyra e Bashkimit Evropian në Prishtinë, pra as komuna e Mitrovicës e as qeveria e Kosovës nuk ka pasuar qasje në këtë tender dhe përzgjedhjen e operatorëve.
“Kontraktori i përzgjedhur nga BE – kompania “CONSTRUCOES EUROPA AR-LINDO SA” – Portugali, pas një pune shumë të dobët që ka bërë në këto objekte thuhet se ka bankrotuar dhe, BE-ja tani ka përzgjedhura me proceduar të përshpejtuar kontraktorin e ri “UNIPROJECT” – SH.P.K. Prishtinë, e cila do të merret me kryerjen e punëve që kanë mbetur në palestrën sportive Minatori”, ka thënë Zeka.
“E sa për vonesën në kryerjeve e punimeve, më as që bëhet fjalë pasi që këto projekt është dashur të përfundojnë në vitin 2014”, shton Zeka.
Zeka ka shtuar më tej se sipas premtimeve të dhëna së fundi nga KE-ja, palestra sportive Minatori do të lëshohet në përdorim në muajin shkurt të 2016.
Por çështja ka ngecur tek standartet e premtuara.
“Palestra Minatori ka pasuar 4 zhveshtore, tani pas rinovimit ka vetëm dy zhveshtore. Nga 78 reflektorë, tani janë vetëm 27. Çatia kurrë nuk ka pikuar, tani çatia pikon. Në sallë vërehen edhe dëmtime ende pa u kryer e tërë puna, nuk është parket por janë dërrasa etj.,” ka numëruar gabimet që janë duke u bërë në rinovim ish-hendobillsti Faruk Mujka.
“Na është thënë se palestra sportive do t`i plotësojë standardet evropiane për zhvillim të garave, por kjo nuk do të ndodhë sepse edhe makinat e sigurisë, ndihma e parë dhe zjarrfikësit, nuk kanë nga të futen aty”, shton ai.
Sakaq, grupi i tifozerisë së klubeve sportive mitrovicas Torcida, protestuan kohë më parë, për shkak si thonë ata të ngecjes së punimeve në rinovimin e palestrës sportive Minatori.
Udhëheqësi i këtij grupi të tifozëve, Shefqet Begu-Çeti, ka theksuar se qëllimi i protestës ka qenë vonesa e madhe në rinovimin e palestrës. Mungesa e palestrës sipas përfaqësuesve të tifozerisë Torcida, ka ndikuar negativisht në garat e këtyre sezoneve. Mungesa e palestrës po sjell edhe demoralizim te lojtarët mitrovicas dhe shuarje të gjeneratave të sportistëve të rinj”, ka thënë Begu.
Faruk Mujka e Shefqet Begu-Çeti, të dy kanë shprehur dyshime se në këto objekte ka keqpërdorime të mëdha, dhe për këtë ftojnë zyrtarë e BE-së, Prokurorinë dhe Policinë e Kosovës që të hetojë mbi këto ndërtime që po kryhen në Mitrovicë. /tesheshi.com/
