Fushata e kandidatit presidencial amerikan demokrat Joe Biden ka hyrë në fazën e fundit të garës zgjedhore me një avantazh të madh financiar ndaj Donald Trump, treguan të martën të dhënat e Komisionit Federal të Zgjedhjeve.
Fushata e ish-zv.presidentit mblodhi më shumë dhe shpenzoi më shumë sesa fushata e Trump në shtator, dhe reklamat politike të Biden tani janë shumë më të pranishme në televizionin amerikan.
Por gjithsesi, avantazhi i Biden në garën e parave nuk është garanci e fitores. Trump doli si fituesi i zgjedhjeve 2016 pavarësisht se kandidatja demokrate Hillary Clinton shpenzoi më shumë se ai.
Sondazhet e Reuters / Ipsos tregojnë se shtetet kryesore federale, të cilat ka të ngjarë të vendosin fituesin e zgjedhjeve të 3 nëntorit, kanë një garë më të afërt se sondazhet kombëtare, të cilat i japin Biden një avantazh të rëndësishëm.
Në fund të shtatorit, fushata e Biden kishte rreth 177 milion dollarë në para, që është pothuajse tre herë më shumë se 63 milion që fushata e Trump kishte në dispozicion.
Fushata e Biden ngriti 281 milion dollarë gjatë muajit, më shumë se tre herë ndaj 81 milion dollarë të mbledhura nga fushata e Trump, tregojnë të dhënat.
Gjithashtu, fushata e tij shpenzoi dy herë më shumë se ajo e Trump.
Fushata e Trump shpenzoi më pak se 56 milion dollarë në reklama në radio dhe televizion në shtator, krahasuar me gati 148 milion dollarë të shpenzuar nga Biden, sipas kompanisë së marketingut Advertising Anaytics LLC. /tesheshi.com/
