Katari ka patur padyshim, finale më dramatike të një Botërori, dhe sigurisht më spektakolare, ku përballja Argjentinë-Francë, ishte njëherësh dhe një përballje Messi-Mbape, ku i pari u shpall Lojtari më i Mirë i Botërorit, duke marrë Topin e Artë, ndërsa i dyti Golashënuesi më i Mirë, duke marrë Këpucën e Artë.
Nuk kishte ndodhur në asnjë finale tjetër që deri në fund të mos dihet se kush do shpallet kampion.
Argjentina mbylli pjesën e parë me një fitore të pastër 2-0, duke dominuar lojën në çdo aspekt. Por futbolli është futboll, i paparashikueshëm, magjik, por dhe mizor. Franca barazon me dy gola të Mbappesë, një me 11-metërsh, duke mbyllur 90 minutat në barazim.
Vjen shtesa. E para pa gola. E dyta, shënon Argjentina. Dhe, kur 120 minutat po mbarronin, Mbappe shënon sërish, në 11-metërshin e dytë.
Tashmë radhën e ka pika e bardhë. Aty, fati është nën anën e Argjentinës, pasi francezët gabojnë dy herë, por jo Mbappe, që sërish shënon, me një rekord të tre penalltive të shënuara në një ndeshje dhe gjithsej katër golave në një finale.
Argjentina, si dikur me Maradonën, shpallet kampione bote me Messin, për të tretën herë në historinë e Botërorëve.
Ndërsa Franca, dy herë kampione bote, humb finalen e dytë në një Botëror.
Kështu, me njëherësh ndeshjen më dramatike të të gjithë Botërorit, Katari kurorëzon Argjentinën, në një event të madh si kurrë më parë për nga organizimi perfekt.
Edhe diçka unike e këtij Botërori: Argjentina, kampionia tashmë, e nisi me një humbje, me Arabinë Saudite modeste. Por ky është futbolli: magjik dhe mizor! /tesheshi.com/
