Më shumë se 5 mijë policë francezë do të vendosen në pika kyçe të Parisit gjatë finales së evropianit mes Francës dhe Portugalisë. Policia do të patrullojë në stadiumin Stade De France, në fan zonën pranë kullës Eiffel dhe në bulevardin e Shamps Elize.
Policia dhe ushtria janë dislokuar në rrugët e Parisit që prej nëntorit të shkuar, ku si pasojë e sulmeve terroriste të shtetit islamik u vranë 130 persona. Militantët dhe kamikazët sulmuan në disa vende të kryeqytetit francez, mes tyre edhe pranë stadiumit Stade De France.
Sipas zyrtarëve franceze, rreth 1 900 policë do të patrullojnë në fan zone ndërsa 3 400 do të vendosen në Shamps Elize- një pjesë e tyre sapo të nisë ndeshja e finales do të zhvendosen nga stadium në veri të Parisit.
Shefi i shtabit të bashkisë së Parisit, Matias Vichera, tha se standardi i sigurisë është në nivelin më të lartë pasi një oficer policie do të ofrojë sigurinë për një grup prej rreth 50 persona.
Edhe nëse Franca fiton sot trofeun nuk do të organizohet asnjë paradë festive për shkak të sigurisë. /tesheshi.com/
