Ndeshja e dytë e serisë së finaleve të NBA-it nuk ka ndryshuar aspak nga ajo e para, me një dominim gati të plotë të Golden State Warriors ndaj Cleveland Cavaliers.
Në “Oracle Arena” të Oakland-it, në prani të rreth 20.000 mbështetësve, pritësit e Golden State-it kanë fituar 132-113, duke e çuar në 2-0 serinë e finaleve.
Pjesa e parë e lojës ka qenë më e ekuilibruar, madje Cleveland do ta fitonte fraksionin e dytë të saj, por gjithçka do të merrte rrokullimën në pjesën e dytë, kur dhe nis shpërthimi i vendasve.
Durant dhe Curry ishin shënuesit më të mirë për Golden State-in, përkatësisht me 33 dhe 32 pikë. LeBron James shënoi 29 pikë, si më i miri shënues për Cleveland-in.
Ngjan që Golden State Warriors po shkon drejt fitores së NBA-it për këtë sezon; një perceptim jo fort i saktë po të kihet parasysh se situata ishte e tillë dhe në sezonin e shkuar, por në fund Cleveland Cavaliers meritoi trofeun pas një përmbysje spektakolare të serisë së finaleve.
Përballja e tretë mes këtyre dy ekipeve është tre ditë më pas, më 8 qershor, e do të luhet në terrenin e Cleveland-it. /tesheshi.com/
