Libianët e kanë ndjerë veten fort të zemëruar me filmin më të fundit amerikan që trajton temën e konfliktit në Benghazi, film që sipas politikanëve, blogerave dhe përdoruesve të rrjeteve sociale është thjesht “filmi aksion tipik në funksion të heroizmit amerikan” e që i pikturon vendasit si “fanatikë dhe injorantë”.
Mediat ndërkombëtare i kanë dhënë jehonë kritikave të shumta që kanë mbërritur në adresë së filmit të Michael Bay që bën fjalë për sulmin fatal të vitit 2012 mbi ambasadën amerikane në Benghazi të Libisë. Kritikat kanë të bëjnë me faktin që filmi ngre lart heroizmin e ushtarëve amerikanë dhe injoron kontributin e banorëve vendas.
Me daljen e klipeve të para të filmit, “13 orë: ushtarët sekretë të Benghazit” kanë nisur edhe trazirat në qytetin e dytë më të madh të Libisë. Zyrtarë të qeverisë, blogerat e internetit dhe përdoruesi e Facebook-ut kanë qenë të gjithë në një mendje duke u bashkuar në kritikat e ashpra ndaj filmit.
Filmi pritet të dalë në kinema më 15 Janar në Shtetit e Bashkuara dhe tregon historinë e ekipit amerikan të sigurisë prej gjashtë personash që luftuan për të mbrojtur kompaundin e ambasadës amerikane në 11 Shtator 2012. Sulmi mbi misionin diplomatik solli edhe vrasjen e ambasadorit amerikan në Libi, J Christopher Stevens, i pari diplomat i këtij rangu që humbet jetën në detyrë që nga viti 1979, në qytetin ku nisi edhe revolucioni kundër diktatorit Muammar Gaddafi-t në shkurt 2011.
Klipet e para tregojnë sesi ekipi amerikan lufton për të shpëtuar “36 jetë amerikane” përballë kryengritësve të armatosur në rrugët e Benghazit (filmi, në fakt është xhiruar në Maltë) ndërsa në sfond shfaqen mjete që shpërthejnë dhe ndërtesa në flakë. Por, ministri i Kulturës dhe Informacionit të Libisë, Omar Gawaari i tha agjencisë
Associated Press, se filmi tregon për kontraktorët amerikanë “që dështuan të sigurojnë ambasadorin, por që tani bëhen heronj”.
Një zëdhënës i ministrisë së Jashtme të Libisë, Salah Belnaba, kritikoi faktin që filmi i portretizon banorët e Benghazit si “fanatikë dhe injorantë” kur pjesa më e madhe e banorëve në fakt, ishin të interesuar të jenë pjesë e komunitetit ndërkombëtar.
Në një postim në Facebook nga banori i Benghazit, Mohamed Kawiri bëhet thirrje për bojkotimin e filmit që ai e cilëson si “për dy lekë”. Ky postim është ripostuar me qindra herë nga përdoruesit e rrjetit social. “Nuk do të lejojmë median amerikane të shkatërrojë reputacionin tonë”, shkruan Kawiri, duke shtuar: “Ishin banorët e Benghazit që luftuan me milicitë”. Ai pretendon se ka ndihmuar vetë në transportimin e ambasadorit Stevens nga kompaundi në flakë dhe thotë se me mijëra protestues dolën në rrugë pas sulmit terrorist për të denoncuar vrasjen e ambasadorit dhe atë të oficerit të zyrës së jashtme, Sean Smith.
Filmi “13 orë: sekreti i ushtarëve të Benghazit” me aktorë kryesorë
John Krasinski, James Badge Dale, Max Martini, Toby Stephens dhe Pablo Schreiber, ka ngritur gjithashtu kundërthënie edhe sa i takon kandidaturës së Hillary Clinton për Shtëpinë e Bardhë. Ajo ishte sekretare shteti në kohën e sulmit dhe është akuzuar se nuk ishte në gjendje të mbronte personelin diplomatik. Ndërkohë në të njëjtën periudhë, ajo akuzohet se ka përdorur emailin privat për punët e shtetit, gjë që ka rënduar pozicionin e saj.
Publikimi i filmit në janar, që koincidon me nisjen e “caucuses”-ve demokrate për përzgjedhjen e kandidaturave mund të ndikojë në fushatën e ish-Zonjës së Parë, sidomos nëse filmi do të ketë sukses.
Regjisori i “The Transformers” shpreson të ketë të njëjtën jehonë që pati filmi i Clint Eastwood, “American Sniper”.
Por, aureola politike që shoqëron filmin nuk ka kaluar pa u vënë re nga blogerat libianë. “Duket se i gjithë filmi është në funksion të lojës për pushtet, ku përdoret vdekja e një njeriu të mirë për të fituar mbështetje politike mbi të tjerët. Në fakt, jo shumë ndryshe nga politikanët libianë këtu”, shkruan një person anonim për blogun libian “Ditari i një revolucioni”.
“Në mes të gjithë kësaj, një qytet i bukur, qyteti im, po shndërrohet në një hiperbolë për një debat që e ka humbur rëndësinë shumë kohë më parë”, shkruan ai. /tesheshi.com/
Trajleri
