Gjyqi për sulmet e janarit 2015 në Francë filloi të mërkurën përpara një gjykate speciale në Paris, më shumë se pesë vjet pas sulmeve në ambientet e gazetës Charlie Hebdo.
Një grup prej 14 personash akuzohet se ka siguruar mbështetje logjistike në mënyra të ndryshme për vëllezërit Said dhe Cherif Kouashi dhe Amedy Coulibaly, autorët e sulmeve.
Gjyqi, i cili po mbahet nën masa të larta sigurie, duhet të përfundojë deri më 10 nëntor, raporton AP.
Gazeta satirike e Parisit ribotoi të martën karikaturat e Profetit Muhamed, të cilat ishin arsyeja e sulmit në redaksi në janar 2015, kur 12 njerëz u vranë.
Në editorial, gazeta shprehet se karikaturat “i përkasin historisë” dhe se “historia nuk mund të ndryshohet ose fshihet”.
Karikaturat u publikuan për herë të parë në 2006 nga gazeta daneze Jilands posten, duke provokuar protesta të ashpra, pasi portretizimi i Profetit Muhamed në atë mënyrë konsiderohet blasfemi. /tesheshi.com/
