Filloi ndërtimi i shtëpive për rastet skamnore të Ferizajt

Këtë të shtunë filloi ndërtimi i shtëpive për rastet skamnore të qytetit të Ferizajt. Ndërtimi i këtyre shtëpive, filloi me mjetet e ndara nga buxheti komunal i Drejtorisë së Shëndetësisë dhe Mirëqenies Sociali si nga organizimi i gala mbrëmjes humanitare që u organizua në qershor të këtij viti.

Me këtë rast kryetari i Ferizajt, Muharrem Svarqa,theksoi se ndërtimi i 23 shtëpive për familjet skamnore për këtë vit dhe gjashtë shtëpive të ndërtuara vitin e kaluar, është një hap shumë i madh,  dhe po zgjidhet një problem për shumë familje me gjendje të rëndë.

“Kjo do të thotë se  28 shtëpi po i ndërtojmë brenda këtyre dy viteve,  dhe po ndikojmë në uljen e numrit të atyre që kanë nevojë për zgjidhjen e  problemit të banimit. Diku pak më shumë se 100 familje i kemi konsideruar me nevojë për ndërtimin e shtëpive të banimit, po ashtu edhe 40  familje të tjerë duke i liruara banesat e uzurpuara do të vendosen familje me gjendje të rëndë sociale. Këtu kemi një familje që ka pasur nevojë të kahershme për zgjidhjen e problemit të banimit dhe jam shumë mirënjohës edhe komisionin që ka punuar me përkushtim për zgjedhjen e njerëzve që kanë pasur nevojë për ndërtimin e shtëpive sic është edhe kjo familje”, është shprehur Svarqa.
Ai ka falënderuar të gjithë biznesmenët ferizajas dhe të gjithë ata që kanë bërë edhe grumbullimin e mjeteve për ndërtimin e shtëpive për të pastrehët.

Edhe drejtori i Drejtorisë së Shëndetësisë dhe Mirëqenies Sociale në Ferizaj, Burim Karameta, ka thënë se kjo është njëra ndër ditët me të lumturat tij, për shkak të asaj se shumë familje skamnore po bëhen me shtëpi të reja.

“Vetëm nga gala mbrëmja e organizuar  në muajin qershor janë grumbulluar rreth 200 mijë euro, dhe 70 mijë euro kanë qenë të ndara nga Drejtoria e Shëndetësisë dhe Mirëqenies Sociale për ndërtim të shtëpive”, është shprehur Karameta.

Nga ana tjetër përfituesit e këtyre shtëpive janë shprehur shumë të gëzuar që më në fund po bëjnë një zgjidhje të përhershme të banimit.

Naim Hasanrak person me të meta psiko-fizike, ka falënderuar të gjithë për ndërtimin e shtëpisë së tij.

“Jam shumë i gëzuar që edhe mu po më ndërtohet shtëpija. Me nënën dhe gruan kam jetuar në shtëpinë  e vëllait”, ka thënë Hasanrak.

Edhe Sami Gashi ka falënderuar të gjithë donatorët dhe Komunën e Ferizajt për ndërtimin e shtëpisë se tij.

“Kam jetuar në një shtëpi tejet të vjetër. Askënd nuk a kam në punë dhe kam pasur kushte shumë të rënda të jetës. Falënderojë të gjithë ata që më përkrahën për ndërtimin e shtëpisë”, ka thënë Gashi.

Përzgjedhja e familjeve për ndërtimin e shtëpive është bërë nga një komision komunal i cili ka punuar gjatë për identifikimin e këtyre rasteve. /tesheshi.com/