Është ndarë nga jeta në moshën 74-vjeçare, ikona e komentit sportiv, Vladimir Grillo, një personazh diskret, me zërin e të cilit identifikohej një epokë e tërë e futbollit shqiptar, një pjesë nën komunizëm e një pjesë në post-komunizëm, sidomos komentet e ndeshjeve të kombëtares.
Por prej vitesh, ai nuk dëgjohej apo shihej më, duke u zëvëndësuar nga emra të tjerë.
RTSH, ku ai punoi një jetë të tërë, e cilëson “një kometator që sportin e përjetonte ndryshe, me një fjalor të zgjedhur dhe fjalë profesioniste”. Por siç veçon media shtetërore ku ai pati një karrierë 40-vjeçare, “emocioni më i madh që ka përjetuar ka qenë goli i shënuar nga Sokol Kushta në ndeshjen Partizani i Beogradit-Flamurtari me 30.09.1987”.
E megjithatë, ai ishtë një kontrollues fantastik emocionesh, ku në asnjë rast nuk ofroi ndonjë shëmti vokale prej kantilenave pa kontroll të zërit.
Sipas një prej kolegëve dhe miqve të tij, Dëfrim Methasani, Grillo u shua nga një sëmundje e rëndë.
“Shuhet ikona e ekranit per sportin Vladimir Grillo, gazetari dhe komentatori me të cilin ndava 25 vite të jetës sime.
Humba një mik të shtrenjtë, ashtu si familja Grillo njeriun më të dashur të saj. Vërtet dhimbje e madhe.
RTSH humbi simbolin sportiv dhe të mikrofonit. Sëmundja e rëndë e rrëzoi mjeshtrin e fjalës dhe komentit në moshën 74 vjeçare.
U prehtë në paqe. Mungesa e tij do të na shoqëroj gjithë jetën”, shkruan Methasani. /tesheshi.com/
