Mishel Platini ka hequr dorë nga dëshira e tij për t’u bërë presidenti i ardhshëm i FIFA-s. Presidenti i pezulluar i UEFA-s deklaroi për agjencinë Associated Press se do të tërhiqet nga gara për shkak të kohës së pamjaftueshme, e cila cakun e saj e ka në fundin e muajit shkurt.
Francezi mbetet i vendosur për ta përmbysur vendimin e komitetit etik të FIFA-s që muajin e shkuar e dënoi me tetë vjet ndalim për të mbajtur çdo post zyrtar, mirëpo nuk do të ketë kohë të mjaftueshme për ta bërë këtë gjë para datës 26 shkurt, ditës së zgjedhjeve.
Kandidatura e tij është e pamundur, e prandaj ai është dorëzuar për këtë proces.
“Unë jam tërhequr nga gara për presidencën e FIFA-s,” tha francezi 60-vjeçar për Associated Press.
“Koha nuk është e mirë për mua. Unë kam mjaft mjete për të luftuar në kushte të barabarta me kandidatët e tjerë. Megjithatë, unë do vazhdoj luftën time në lidhje me dënimin e padrejtë të dhënë nga komisioni i etikës,” ka përfunduar zemërthyer Mishel Platini. /tesheshi.com/
