Ndeshja mes Afrikës së Jugut dhe Senegalit, e vlefshme për Botërorin “Rusia 2018” do të përsëritet. Vendimi është marrë nga FIFA, ndërsa arbitri kryesor i takimit është pezulluar përjetësisht nga kompeticionet futbollistike.
Afrika e Jugut dhe Senegali bëjnë pjesë në Grupin D të konfederatës afrikane, ku diferenca mes ekipit të parë dhe të fundit është vetëm dy pikë.
Burkina Faso dhe Kepi i Verdhë kanë nga 6 pikë, Senegali 5 dhe Afrika e Jugut 4.
Në takimin mes Afrikës së Jugut dhe Senegalit, vendasit fituan 2-1, ndërsa arbitri nga Gana, Joseph Lamptey, rezultoi se ishte i përfshirë drejtpërsëdrejti në trukimin e rezultatit.
Në ndeshjen e luajtur në stadiumin Peter Mokaba, Lamtey vërshëlleu për një 11-metërsh të paqenë për prekje të topit me dorë nga senegalezi Kulibaly në fund të pjesës së parë.
Për çudi të të gjithëve kryesori ganez e drejtoi gishtin nga pika e bardhë.
Më pas u zbulua se Lamptey kishte pasion bastet, sidomos ato me shumë gola, ndaj kishte bërë gjithçka që në këtë sfidë të drejtuar nga ai vetë, të shënoheshin të paktën tre gola.
Tashmë që ndeshja do të riluhet, situata në këtë grup mund të ndryshojë. /tesheshi.com/
