Presidenti i Federatës Ndërkombëtare të Futbollit (FIFA) Gianni Infantino ka njoftuar në Budapest, në Kongresin e Shoqatës Ndërkombëtare të Gazetarëve Sportivë (AIPS), se organizata e tij do të investojë një miliard e gjysmë euro në futbollin afrikan gjatë katër viteve të ardhshme,.
Diskutimi në panel me njeriun e parë të futbollit botëror u drejtua nga Presidenti i AIPS Gianni Merlo ku u trajtuan çështje në futbollin afrikan, racizmin, futbollin e grave …
“Bashkëpunimi aktiv midis FIFA-s dhe Federatës Afrikane të Futbollit (CAF) filloi gjashtë muaj më parë. Ne kemi bashkuar forcat dhe kemi dalë me disa ide se si të ndryshojmë futbollin afrikan. Misioni im dhe qëllimi im është që ta bëj futbollin global. Futbolli është sporti i parë në botë, por zhvillohet më shumë në vetëm pesë deri në gjashtë shtete perëndimore. Gjashtë nga tetë çerekfinalistët nga Botërori i fundit në Rusi ishin vendet e Evropës. Hendeku po zgjerohet midis Evropës dhe pjesës tjetër të botës dhe kjo është arsyeja pse unë isha në Afrikë”, tha Infantino, i cili mbërriti në Budapest nga Rabati ku morri pjesë në një takim të Bordit Ekzekutiv të CAF.
Ai theksoi se korrupsioni dhe parregullsitë e tjera në futboll janë shumë të përhapura në Afrikë, ku menaxhimi është akoma i dobët në disa vende. Ai tha se ndihma financiare e FIFA-s do të përqëndrohej në infrastrukturën, sistemin e konkurrencës dhe forcimin e komunitetit të arbitrave.
“Unë gjithashtu sugjerova krijimin e një Super League, e cila do të gjenerojë dyqind milion dollarë në të ardhura tregtare. Afrika eksporton numrin më të madh të lojtarëve në botë, por vetëm kjo nuk ndihmon zhvillimin”, shtoi Infantino.
Infantino ka njoftuar gjithashtu investime në futbollin e grave.
“Unë kam katër vajza dhe kur kthehem në shtëpi kam shumë presion nëse nuk mbështes futbollin e grave”, tha presidenti i FIFA-s. /tesheshi.com/
