Federata Botërore e Futbollit (FIFA) së shpejti mund të bëjë një ndryshim rrënjësor në rregullat për pozicionin jashtë loje, pas iniciativës së Arsene Wengerit.
Rregulli i ri supozohet se do të emërohet sipas tij – rregulli “Wenger”.
Trajneri i famshëm i Arsenalit është kreu i zhvillimit të futbollit global të FIFA-s dhe ka mbrojtur prej kohësh një ndryshim të rregullit jashtë loje. Francezi beson se ky është problemi kryesor me teknologjinë VAR dhe sugjeron ndryshimin e mëposhtëm:
“Propozimi im është që një lojtar të mos jetë jashtë loje nëse ndonjë pjesë e trupit të tij që mund të përdorë për të shënuar është në linjë me lojtarin e fundit të mbrojtjes kundërshtare, edhe nëse pjesa tjetër e trupit të sulmuesit është para mbrojtësit.” tha Wenger.
Pra, Wenger dëshiron të prezantojë rregullin diametralisht të kundërt nga ai aktual, sipas të cilit as edhe një milimetër i trupit të sulmuesit nuk mund të jetë para lojtarit të fundit mbrojtës.
“Duhet ta ndryshojmë situatën shpejt. Ka vend për të ndryshuar rregullat. Nuk mund të marrim parasysh që një pjesë e hundës së lojtarit është në pozicion të paligjshëm, kështu që ai është jashtë loje sepse lejohet të shënojë me hundë,” shpjegon Arsene, ideja e të cilit u miratua nga FIFA.
Sipas raportimeve, para se të miratohet plotësisht, rregulli i Wengerit do të testohet në praktikë. Fillimisht në ndeshjet në Suedi, e më pas në Holandë dhe Itali. /tesheshi.com/
