Zvicerani Gianni Infantino u zgjodh sërish me aklamacion president i Federatës Ndërkombëtare të Futbollit (FIFA) edhe për katër vite të tjera.
Infantino është në këtë pozitë që nga viti 2016 dhe në kongresin e ombrellës së organizmit të futbollit botëror në Kigali të Ruandës, ai nuk kishte kundërshtar.
Infantino, 52 vjeç, mandati i të cilit u konfirmua nga delegatët e 211 shoqatave anëtare, mund të qëndrojë në krye të futbollit botëror deri në vitin 2031, megjithëse statuti i FIFA-s parashikon maksimum tre mandate katërvjeçare. Megjithatë, mandati i tij i parë trevjeçar, i cili filloi në vitin 2016, konsiderohet i paplotë.
Gjendje e qëndrueshme financiare
“Ju dua të gjithëve”, ishte reagimi i parë i kreut të Organizatës Botërore të futbollit para turmës pas zgjedhjeve.
Para kësaj, ai dorëzoi një raport financiar në të cilin FIFA tregon një bilanc solid, me një rritje të të ardhurave, gjë që i lejon FIFA-s të rrisë më tej subvencionet për konfederatat dhe federatat.
Projekti kryesor i Infantinos për vitet e ardhshme do të jetë Kupa e Botës 2026 e organizuar nga Shtetet e Bashkuara, Kanadaja dhe Meksika. Në atë garë, numri i ekipeve kombëtare do të rritet nga 32 në 48 kombëtare. Faza e grupeve do të ketë 12 grupe me nga katër kombëtare, të cilat do të rrisin numrin e ndeshjeve nga 64 në 104, gjë që do të sjellë të ardhura shtesë nga biletat dhe do të tërheqë akoma më shumë transmetues. /tesheshi.com/
