Një zhvillim i rëndësishëm ka ndodhur në sferën e arsimit kohët e fundit, por që ka kaluar pa shumë bujë për shkak të një zhvillimi krejt legal.
Bëhet fjalë për një nga asetet e FETO-s në Shqipëri, Universiteti BEDËR, që tashmë ka ndryshuar pronësi dhe është në duart e një konsorciumi të ri, pra të një subjekti tjetër.
Ende nuk dihet a bëhet fjalë për transferim apo dorëzim të aseteve, por publikisht kemi të bëjmë me një pronësi të re të Universitetit që tashmë ka një pronar të ri, Fondacionin “Hafiz Ali Korça”.
Ky fondacion është themeluar nga Komuniteti Musliman Shqiptar dhe është realisht subjekti që zotëron Universitetin BEDËR.
Në këtë sipërmarrje, mësohet se është edhe një partner privat, i cili ka marrë përsipër të financojë universitetin, që pritet gjithashtu të ketë edhe një grup të ri administrativ.
Prej kohësh, qeveria turke i ka kërkuar Tiranës zyrtare që të mbyllë apo të çmontojë rrjetin FETO në vend, pasi sipas institucioneve të Ankarasë, ato akuzohen për aktivitete të cilat pas grushtit të dështuar të shtetit të korrikut 2016, konsiderohen anti-Kushtetuese..
Burime nga stafi akademik i Universitetit BEDËR bëjnë të ditur se këto ditë kanë përfunduar edhe procedurat administrative të transferimit të pasurisë dhe pritet që të ketë edhe një ristartim të stafit dhe mënyrës së menaxhimit.
Ndërkaq, vetë Fondacioni “Hafiz Ali Korça” ka bërë të ditur se ka ndërmarrë një nismë të rëndësishme për të financuar mjaft studentë të ekselencës që të vazhdojnë projektet e tyre të kërkimit shkencor.
Në një komunikatë të fondacionit të disa ditëve më parë theksohet se “janë dhënë 100 bursa për studentët më të mrë që të vazhdojnë studimet e larta në Universitetin BEDËR”.
Në fakt ky institucion i lartë arsimor u themelua dhe iu dha liçencë nga qeveria “Berisha”, pas një debati të pasurit në Shqipëri të një universiteti islam, me pretendimin që të dilnin prej aty kuadrot fetarë, pa qenë nevoja për formim në shkollat e Lindjes. Dhe ky universitet, natyrshëm do themelohej dhe drejtohej nga KMSH. Por, nisur nga fakti që drejtues të këtij institucioni i përkasin grupimit të Gylenit, edhe universiteti morri trajtat e kolegjeve apo fitoi në ngjashmëri me Universitetin Epoka, pjesë e korporatës arsimore të FETO-s.
Prej një kohësh, që pas ngjarjeve të korrikut ku qeveria turke akuzoi Gylenin si kokën e grushtit të shtetit, Ankaraja zyrtare i kërkon me ngulm Tiranës, gjithashtu zyrtare, çmontimin e strukturave gyleniste në Shqipëri, ku përfshihen biznese dhe shkolla. /tesheshi.com/
