Njihen te shqiptarët e Maqedonisë festat lokale, të cilat zakonisht organizohen gjatë verës. Një e till është dhe ajo e Zhelinës në Pollog, mes Tetovës, Shkupit dhe Gostivarit.
Është komuna ajo që njofton festimet dy ditore, të cilët ka vendosur t’i shndërrojë në traditë. Ato përkojnë zakonisht me atë periudhë ku shumë mërgimtarë kthehen në troje pët të qëndruar për disa ditë apo javë.
Festa në këtë rast ka të bëjë me mbajtjen gjallë të një trashëgimie dhe identiteti nga harresa e shpërbërja.
“Me rastin e ardhjes së mërgimtarëve në vendlindje dhe me qëllim të kultivimit të vlerave kulturore, ruajtjen dhe mbartjen e tyre në gjeneratën e ardhshme Komuna e Zhelinës e organizoi Festivalin e trashëgimisë kulturore i cili do të jetë tradicional dhe do të organizohet për çdo vit. Ky festival ka filluar me datë 18 korrik, ndërsa do të përfundojë sot, 20 korrik 2018. Pjesë e programit të Festivalit të trashëgimisë kulturore ishin prezantimi dhe njohja nga afër me veshjet tradicionale, gatimin, veglat e punës, traditën dhe kulturën e zonës së Komunës së Zhelinës me ç’rast u ekspozuan një sërë veshjesh kombëtare, vegla pune dhe relikte që janë përdorur në të kaluarën, veshje dhe shumë specialitete nga kuzhina kombëtare e kësaj zone. Gjithashtu pjesë e programit të Festivalit ishte edhe ndeshja e shumëpritur e pehlivanëve, valle dhe këngë kombëtare nga ansamble të ndryshme, muzikë dhe pika humoristike nga artistë të mirënjohur të kësaj zone”, thuhet nga Komuna e Zhelinës.
Në një festë të tillë kishte shumë shfaqje, ku veç atyre me performanca artistike, këngë e vallë, u dha dhe ajo e quajtur e pëhlivanëve, mundje mes të rinjve të zonës. Është kjo një ndër shfaqjet më tërheqëse, ku turmat ngazëllehen duke parë trupat e djersirë në përpjekje për ta sfiduar njëri tjetrin. /tesheshi.com/
