Më shumë se një ndeshje, ka qenë një festë takimi miqësor sot në kryeqytetin e Kosovës mes dy përfaqësueseve që flasin të njëjtën gjuhë.
Një stadium i mbushur, i shoqëruar me këngë, duartrokitje e brohoritje pa fund. Njëra përfaqësuese, ajo e Shqipërisë, bëhet gati të debutojë në një aktivitet elitar, siç është kampionati europian, kurse përfaqësuesja tjetër, ajo e Kosovës, është në hapat e para të rrugëtimit të saj të gjatë. E këto kombëtare u ndeshën sot me të vetmin mision: t’i kënaqnin të pranishmit, e po ashtu ata që po i ndiqnin nga ekranet televizive.
Një detyrë e kryer, pasi 90 minutëshi ishte mjaft tërheqës, i zbukuruar dhe me katër gola në pjesën e dytë.
Në të 55-ën minutë vjen deputimi i Rei Manajt, lojtarit të Interit në kampionatin italian, për kombëtaren shqiptare. E nuk kalojnë veç paksa sekonda, dhe djaloshi i talentuar ka shënuar për Shqipërinë.
Shifrat do të barazoheshin më pas nga Celina. Manajt i përgjigjet një tjetër debutues në anën tjetër të fushës, Rashani, që në parin takim të tij shënon gol.
Rrahmani mendon për të qetësuar më të shqetësuarin në fushë, teknikun De Biasi, të cilin nuk e mban vendi, duke e përjetuar gjithçka me seriozitetin e një ndeshjeje të vërtetë. Goli i futbollistit të sipërpërmendur e fikson rezultatin në 2-2.
Në fund, me vërshëllimën e bilbilit, radhën e kanë përqafimet, me urimet e kosovarëve për vëllezërit e tyre nga Shqipëria: suksese në Francë! /tesheshi.com/
