Nga Blendi Gashi
Qeveria dhe opozita kosovare po përgatiten për 17 shkurt. E para për festë, e dyta për protestë.
Shënimi i 8-vjetorit të pavarësisë së Kosovës do të ngelet gjatë në mendje pasi për herë të parë për këtë ditë të shënuar qytetarët nga mbarë Kosova nuk do të vijnë në Prishtinë vetëm për të festuar deri në orët e vona siç kanë bërë vitet e kaluara, por disa prej tyre do të udhëtojnë në kryeqytet për t’iu bashkangjitur protestës që do të organizohet në ora 14:00 nga tri partë opozitare VV, AAK, NISMA.
Ky përvjetor pritet me ankth, pasi duke parë çfarë ngjau më 28 Nëntor, ka frikë se mund të përsëritet fotografia e njëjtë, që protesta të eskaloi dhe në vend të festës Prishtina të mbulohet nga tymi.
Analistët dhe ekspert të sigurisë në vend deklarojnë se është vështirë të thuhet se çfarë me të vërtetë do të ndodh më 17 shkurt, por sipas tyre janë qytetarët vetë ata të cilët do të vendosin nëse do festojnë apo protestojnë.
Analisti politik, Arben Qirezi thotë se Dita e Pavarësisë është ndarë në dysh, pra (festa) e qeverisë dhe (protesta) e opozitës.
“Është vështirë të parashikohet diçka e tillë. Paralajmërimet janë se do të ketë protestë të paqësore, prandaj nuk ka arsye të besohet se ajo do të eskalojë. Sidoqoftë, Dita e Pavarësisë është e njëjtë për të gjithë qytetarët dhe dikush do të zgjedhë ta shënojë atë përmes pjesëmarrjes në protestë e dikush përmes mënyrave të tjera”, ka deklaruar Qirezi për tesheshi.com.
Edhe politologu, Nexhemdin Spahiu thotë se nuk mund ta parashikoj se si do të zhvillohet protesta e opozitës.
“Me atë se si pa ngulfatet shteti i Kosovës nga liderët e saj politikë, festimi i ditëlindjes së këtij shteti humb kuptimin tërësisht”, thotë Spahiu për tesheshi.com.
Eksperti i sigurisë, Drizan Shala thotë se nuk mund të thuhet sigurt se s’do të ketë eskalim të situatës në protestën e opozitës që do të mbahet Ditën e Pavarësisë.
“Policia duhet të jetë e përgatitur në aspektin operacional pasi mund të keqpërdoret masa për interesa të ndryshme, dhe të eskaloi situata si në protestat e kaluara”, ka thënë Shala për tesheshi.com.
Keshilli organizativ ka nisur përgatitjet
Këshilli Organizativ për shënimin e tetëvjetorit të pavarësisë së Kosovës, ka nisur ditë më parë përgatitjet për të koordinuar aktivitetet.
Këtë e ka bërë të ditur për mediat, zëdhënësi i QeverisëArban Abrashi.
Ai ka thënë se në përbërjen e plotë të Këshillit që do të merret me këtë çështje janë:
Ministria e Kulturës, Rinisë dhe Sportit e cila kryeson Këshillin, pastaj do të ketë anëtarë nga Ministria e Forcës së Sigurisë së Kosovës, Punëve të Jashtme, Punëve të Brendshme, Zyrës së Kryeministrit.
Aty përfaqësues do të ketë edhe Presidenca, Kuvendi, Komuna e Prishtinës, Organizatat e dala nga lufta e UÇK-së, Asociacioni i Komunave të Kosovës dhe përfaqësues të Organizatave Joqeveritare. /tesheshi.com/
