Nga Blendi Gashi
Të gjitha institucionet publike të Kosovës dje kishin ditë pushimi. Arsyeja ishte festa e Pashkëve katolike, edhe pse ajo ishte të dielën.
Kjo falë Ligjit për Festa zyrtare i cili thotë se nëse festa i bie të jetë të shtunën ose të dielën atëherë kompensimi i saj bëhet në një ditë të punës, që zakonisht bëhet të hënave. Ndodh kjo dhe në Shqipëri.
Hiç më larg se edhe javën tjetër do kenë sërish pushim të hënën. Më 8 prill (e dielë) është dita e Kushtetutës dhe po ashtu janë edhe Pashkët Ortodokse, ndërsa më 9 prill (e hënë) s’do punohet.
Kjo praktikë ka vite që përcillet, ndërsa është kritikuar nga shoqëria civile, për çka deputetët më pas kanë kërkuar që ligji për Festat Zyrtare të ndryshohet, por një gjë e tillë ende nuk është shqyrtuar në Parlament.
Ajo çfarë dihet deri tani dihet është se në muajin shkurt të këtij viti, Komisioni kuvendar për të Drejtat, Interesat e Komuniteteve dhe për Kthim formoi grupin punues për ndryshimin dhe plotësimin e ligjit në fjalë, por që nuk ka një datë se kur ky ligj do të procedohet për në Kuvend.
Se ky ligj pritet të vendoset në planin legjislativ të këtij viti, e ka thënë edhe Ministria e Administratës Publike (MAP).
“MAP, në bashkëpunim me Zyrën e Kryeministrit janë në diskutim që këtë ligj ta vendosim në Planin legjislativ të vitit 2018. Se çka më konkretisht do të bëhet, do të vendoset më vonë në bashkëpunim me palët e interesit, bizneset, shoqërinë civile, e tjera”, ka thënë zyra për media e MAP-it.
Dhe derisa institucioni ligjvënës ta thotë fjalën e tij, Kosova do vazhdojë të ketë në kalendarin e saj njëmbëdhjetë festa zyrtare, duke përfshirë edhe Ditën e Evropës, që nuk kremtohet as shtetet që janë pjesë e Bashkimit Evropian.
Ja cilat janë festat zyrtare në Kosovë sipas ligjit:
- a) Viti i Ri-1 dhe 2 janari;
- b) Dita e Pavarësisë së Republikës së Kosovës, 17 Shkurti;
- c) Dita e Kushtetutës së Republikës së Kosovës, 9 Prilli;
- d) Dita Ndërkombëtare e Punës, 1 Maji;
- e) Dita e Evropës, 9 Maji;
- f) Bajrami i Madh, dita e parë;
- g) Bajrami i Vogël, dita e parë;
- h) Krishtlindjet Katolike, 25 dhjetor;
- i) Krishtlindjet Ortodokse, 7 janar;
- j) Pashkët Katolike, E hëna e Pashkëve;
- k) Pashkët Ortodokse, E hëna e Pashkëve.
Ditët memoriale janë:
- a) 28 Nëntori, dita e shqiptareve;
- b) 12 Qershori, dita e paqes;
- c) 6 Marsi, dita e Përkujtimit dhe e Respektit për Veteranet;
- d) 23 Prilli, dita e turqve;
- e) 8 Prilli, dita e romeve;
- f) 15 Shkurti, dita e ashkalinjëve;
- g) 28 Shtatori, dita e boshnjakeve;
- h) 6 Maji, dita e goranëve. /tesheshi.com/
