Festat e fundvitit kanë nxjerrë në terren inspektorët e Autoritetit Kombëtar të Ushqimit në të gjithë vendin. Gjatë kontrolleve të kryera vetëm në dy javë ka rezultuar se në mbi 20 për qind të rasteve janë konstatuar me shkelje. Në një njoftim për mediat, AKU sqaron se janë kryer inspektime në subjektet ushqimore, pra ku produktet prodhohen dhe tregëtohen.
“Autoriteti Kombëtar i Ushqimit brenda dy javëve ka zhvilluar një kontroll në rreth 950 subjekte në të gjithë vendin. Nga ky kontroll kanë rezultuar me probleme 220 biznese, ndaj të cilave është marrë masa administrative “Parlajmërim” dhe “Gjobë”. Kontrollet janë kryer në dyqanet e mishit, në subjektet ku tregtohet nënproduktet e qumështit, në restorante etj.”, thuhet në njoftimin e AKU-së.
Edhe mënyra e tregëtimit ka rezultuar me probleme të shumta, pasi përbënte rrezik për shëndetin e konsumatorëve.
“Përveç dyqaneve, janë kontrolluar edhe tregjet, ku janë vërejtur problematika të ndyrshme dhe është bllokuar një sasi e konsiderueshme mishi. Gjithashtu janë inspektuar edhe byrektoret, Fast-Food-et, zgarat e qofteve , ku janë vendosur disa gjoba në vlerën prej 100.000 lekë”, thuhet më tej në njoftimin zyrtar.
Në kryeqytet është bërë bllokimi i aktivitetit për 2 subjekte, të cilat tregtonin ushqime pa plotësuar kushtet. Gjobat për ato subjekte të cilat tregtojnë pa plotësuar kushtet e sigurisë ushqimore kanë qënë nga 100.000 deri në 300.000 lekë.
Pak ditë më parë, kryeministri Edi Rama tërhoqi vëmendjen e bashkive dhe autoriteteve vendore për gjendjen në të cilat ndodhen aktualisht tregjet e gjësë së gjallë, Madje, ai i krahasoi ato të ngjashme me tregjet e mesjetës, ndërsa për këtë fajësoi bashkitë si përgjegjëset e drejtëpërdrejta për tolerimin e tyre.
Autoriteti Kombëtar i Ushqimit njofton herë pas herë për kontrolle dhe sanksione për subjektet, por nëse do të kishte të njëjtin intesitet si në periudhën e prag-festave, ndoshta tregëtarët do të ndërgjegjësoheshin më shumë dhe konsumatorët do të blinin më të sigurt./tesheshi.com/
