Presidenti Meta zgjodhi të bëjë një diversion politik në kuadër të 100-vjetorit të shpalljes së Tiranës kryeqytet, duke e kremtuar përvjetorin veçmas dhe te ambientet e Teatrit Kombëtar.
Duke e kthyer dhe çështjen e teatrit në “kalë beteje” me Ramën, ai, në fjalën e tij me thirrje në sfond “Rama Ik”, u zhvendos tërësisht te teatri.
“E vlerësoj faktin e organizimit të këtij manifestimi përkujtimor në ambientet e Teatrit tonë Kombëtar, kësaj pasurie kulturore të pazëvendësueshme të jetës shpirtërore të kryeqytetit dhe mbarë kombit tonë. Ky gjest është një thirrje në lartësinë e shekullit për të ruajtur e mbrojtur trashëgiminë e pasurisë arkitektonike e kulturore të kryeqytetit ndër vite!
Përshëndes kurajën tuaj qytetare dhe dua t’ju siguroj për mbështetjen time të vazhdueshme”, iu drejtua Meta të pranishmëve në ceremoni, përgjithësisht grupimit që kundërshton prishjen e godinës ekzistuese, për të ndërtuar në vend të saj një të re. /tesheshi.com/
