Një person ka humbur jetën nga zjarret që kanë përfshirë prej ditës së djeshme periferinë të Athinës. Personi i vdekur është një grua, e gjetur në një dyqan në veri të Athinës.
Zëdhënësi i shërbimit zjarrfikës Vassilios Vathrakogiannis tha se “megjithëse nuk ka më zjarre aktive në pjesën veri-lindore të rajonit të Atikës pranë Athinës, ka zjarre më të vogla të lokalizuara, kryesisht rreth qyteteve Marathon dhe Penteli”, siç raportohet nga BBC.
Zjarret iu afruan kryeqytetit të Greqisë të hënën dhe kushtet për përhapjen e flakëve janë lehtësuar nga erërat që fryjnë. Zëdhënësi shtoi gjithashtu se kushte të tilla përhapën zjarrin dhe se zona “është nën rrezik të lartë zjarri, jo vetëm të martën, por gjatë gjithë javës”.
Siç tha edhe ai, dy zjarrfikës janë shtruar në spital për shkak të djegieve që kanë marrë gjatë shuarjes së zjarrit.
Deklaratat zyrtare të bëra të hënën flasin për dyzet zona të prekura aktualisht nga zjarret dhe flakët e zjarrit arritën deri në 25 metra.
Shumica e qytetarëve u evakuuan dhe Observatori Kombëtar i Greqisë bëri të ditur se pamjet satelitore tregojnë se deri në mesditën e sotme zjarri ka përfshirë rreth 100 mijë hektarë tokë.
Vendet evropiane kanë njoftuar ndihmë për Greqinë, përfshirë Ursula von der Leyen, e cila shkroi në Platformën X se “Bashkimi Evropian do të qëndrojë pranë Greqisë ndërsa lufton zjarret shkatërruese”.
