Një zjarr në pyll i nxitur nga erërat e forta është ndezur mëngjesin e sotëm në zonën malore Pentelik pranë Athinës, duke përfshirë shtëpitë, duke bërë që autoritetet të urdhërojnë evakuimin e të paktën nëntë zonave dhe një spital për fëmijë.
Tre zjarrfikës dhe nëntë banorë të zonës pësuan lëndime të lehta dhe u dërguan në spital me vështirësi në frymëmarrje, njoftoi transmetuesi shtetëror ERT.
Retë e trasha tymi errësuan qiellin mbi Penteliko ku zjarri shpërtheu rreth orës 14:30 të së martës, rreth 27 kilometra në veri të Athinës qendrore. Deri më tani, nuk ka raportime për viktima, thanë zjarrfikësit.
Në betejën me elementin e zjarrit në disa fronte marrin pjesë rreth 485 zjarrfikës dhe 120 makina zjarrfikëse. Pesëmbëdhjetë helikopterë dhe avionë hodhën ujë mbi flakët dhe operacionet u ndërprenë gjatë natës për arsye sigurie.
“Ishte një natë e vështirë”, tha zëdhënësi i stacionit të zjarrfikësve, Jianis Artopios, në një fjalim televiziv, duke shtuar se shpejtësia e erës i kalonte 80 kilometra në orë.
“Për shkak të intensitetit dhe shpejtësisë së erërave, zjarri gjatë natës ka ndryshuar vazhdimisht drejtim, gjë që e ka vështirësuar edhe më shumë luftimin e tij”, tha ai.
Autoritetet lokale njoftuan se disa shtëpi në zonën e Palinit u dogjën nga zjarri. Autoritetet urdhëruan evakuimin e nëntë zonave, duke përfshirë Palinin dhe Gerakasin.
Një spital dhe Observatori Kombëtar në Athinë u evakuuan si masë paraprake. Trafiku u ndalua në rrugët që të çojnë në Penteli dhe të paktën 600 banorë kishin nevojë për ndihmën e policisë për të gjetur një rrugëdalje nga zona e përfshirë nga zjarri.
Erërat e forta parashikohet të vazhdojnë edhe sot pasdite. Zjarrfikësit thanë se 28 zjarrfikës nga Rumania po ndihmojnë zjarrfikësit lokalë. Më shumë se 200 zjarrfikës dhe pajisje nga Bullgaria, Franca, Gjermania, Rumania, Norvegjia dhe Finlanda do të jenë në gatishmëri gjatë muajve më të nxehtë të korrikut dhe gushtit në Greqi.
Vitin e kaluar, zjarret pyjore shkatërruan rreth 121,000 hektarë pyje dhe shkurre në pjesë të ndryshme të Greqisë, të cilat përjetuan valën më të keqe të të nxehtit në 30 vjet. /tesheshi.com/
