Rezultati në takimin e së enjtes mes Deportivo La Korunjës dhe Atletikos së Madridit kaloi krejt në plan të dytë pas shembjes në tokë të Fernando Torres-it në minutat e fundit.
Një përplasje e sulmuesit veteran të Atletikos me kundërshtarin Alex Bergantinos krijoi ankth e panik mes lojtarëve, tifozëve në stadium dhe atyre që po e ndiqnin takimin e kampionatit spanjoll nga ekrani.
Torres do të ndihmohej fillimisht nga shokët teksa dukej qartë të dergjej pa ndjenja në fushë. 32-vjeçari do të dërgohej menjëherë në spital, prej nga fatmirësisht do të vinte lajmi për gjendjen e tij të “qëndrueshme, të vetëdijshme dhe të kthjellët”.
Mesazhet e mbështetjes për të do të vinin nga të katër anët, mes të cilëve spikaste ai i Çelsit, skuadrës londineze ku ai çoi një pjesë të karrierës së tij.
Në fund, ka qenë vetë Torres që i ka qetësuar të gjithë të merakosurit me një mesazh në Twitter pak pas mesnate: “Shumë faleminderit çdokujt për interesimin për mua dhe për mesazhet mbështetëse. Ishte vetëm një moment frike. Shpresoj të kthehem shumë shpejt.”
Sa i takon ndeshjes, ajo u mbyll në barazim 1-1; një rezultat që e shkëput akoma më tepër Atletikon nga tre ekipet e para të klasifikimit të La Ligës. Atletiko rrezikon tani dhe vendin e katërt, me Real Sociedadin dhe Vilarealin shumë pranë. /tesheshi.com/
