Një fermer francez ka përfunduar në bankën e të akuzuarve në një proces gjyqësor në Francë, i akuzuar për ndihmë ndaj emigrantëve të cilët kanë kaluar kufirin nga Italia.
Ky proces gjyqësor, në të cilin ai akuzohet se u ka siguruar emigrantëve strehim, ka shtuar edhe më shumë ndarjet në opinionin francez mbi atë se si po trajtohen emigrantët në Evropë.
Cedric Herrou, një fermer ulliri dhe pulash nga një fshat në kufi me Italinë, rrezikon një dënim maksimal me 5 vjet burg dhe një dënim prej 30 mijë euro nëse shpallet fajtor. Por Herrou nuk është penduar, ndërkohë që të mërkurën u mbajt seanca e dëgjimit për rastin e tij në një gjykatë në Nicë, raportoi CNN duke iu referuar BFMTV.
Një turmë prej më shumë se 300 njerëzish u mblodhën për t’u solidarizuar me fermerin dhe aktivistin në momentin kur ai u largua nga gjykata, njofton BFMTV. Disa mbajtën një baner në të cilin shkruhej: “Po solidaritetit dhe mikpritjes së emigrantëve dhe refugjatëve”. Para gazetarëve, Herrou thotë: “Nuk më takon mua të bëj dallimin midis popullit të zi dhe të bardhë, me ose pa letra. Kjo nuk është puna ime. Bujqësia është ajo që unë bëj, puna ime është të ushqej njerëzit dhe kjo është ajo që unë bëj… ”
Herrou ka strehuar disa qindra emigrantë gjatë muajve të fundit në ambientet e shtëpisë së tij në Breil-sur-Roya, në kodrat mbi qytetin e rivierës franceze të Menton dhe qytetin italian të Ventimiglia, sipas BFMTV.
Vendimi gjyqësor mbi rastin pritet e tij të shpallet me 10 shkurt, tha për CNN avokati i Herrou, Zia Oloumi.
Evropa është përballur me një lëvizje masive të emigrantëve të larguar nga lufta, persekutimi dhe varfëria, veçanërisht në Lindjen e Mesme dhe Afrikë. Qindra mijëra kanë kaluar Mesdheun, shumë duke arritur në Itali dhe duke kërkuar për të vazhduar tutje udhëtimin prej aty. Sipas Oloumi, Herrou u arrestua më 20 tetor së bashku me tre persona të tjerë, në një pronë që i përkiste kompanisë kombëtare franceze hekurudhore, SNCF. Me ta ishin 57 emigrantë, nga të cilët 29 ishin fëmijë, sipas Oloumi, si dhe rreth 30 anëtarë të një OJQ-je të drejtuar nga Herrou, përfshirë mjekët dhe infermieret.
Nga tre të arrestuarit, vetëm Herrou po ndiqet penalisht, tha Oloumi, me akuzat për “ofrimin e ndihmës në hyrjen, qëndrimin dhe qarkullimin e të huajve në një situatë të paligjshme” dhe “pushtimit të paligjshëm të një prone private.” Por ai i mohon akuzat. “Ky është një gjykim politik; çfarë bëri Cedric Herrou nuk është e paligjshme”, tha Oloumi për CNN.
Ai shtoi: “Ajo që më shqetëson është fakti se vlera e republikës, solidaritetit, mund të zhduken për shkak të interpretimit të gabuar të ligjit.” Herrou thotë se ai u ka ofruar refugjatëve të rinj një vend për të qëndruar dhe për të pushuar, para se të vazhdojnë udhëtimin e tyre. “Në luginën Roya kjo është traditë,” thotë ai. “Nëse shikoni Luftën e Dytë Botërore, ne kemi një histori të ofrimit të ndihmës ndaj njerëzve në nevojë duke i mirëpritur ata. Ne kemi një frymë rebele”.
Në mesin e emigrantëve i cili foli për CNN ishte dhe Zahra, 14-vjeçare, e cila kishte udhëtuar me mbesën e saj të vogël për gjashtë muaj. Ajo thotë se Herrou pos tjerash, u ofroi atyre më të rëndësishmen: e ajo është shpresa. “Ai është si ati ynë, nëna jonë”, tha ajo për CNN. “Gjatë gjithë jetës sime nuk kam takuar kurrë dikë si Cedric. Ai është shumë i sjellshëm dhe na ndihmon të gjithëve këtu.” /tesheshi.com/
