Që në nisje të ditës, Rama e Basha kanë këmbyer replika COVID me statuse përkatëse në rrjete.
Kreu i opozitës pretendon se, nëse shefi i qeverisë do ia kish dëgjuar këshillat, vala e dytë nuk do qe me këto tregues.
“Numri i të sëmurëve nga Covid-19 po rritet përditë, fatalitetet po shtohen dhe kapacitetet shëndetësore po shkojnë drejt kolapsit. Rama ka humbur kontrollin mbi pandeminë, megjithëse vala e dytë ishte paralajmëruar. Po të na kishte dëgjuar, qeveria do kishte marrë masat e duhura”.
“Në vend të llafeve, sot më shumë se kurrë duhen vendime dhe veprime të shpejta për të rritur testimet dhe fonde për të ndihmuar të sëmurët, shëndetësinë dhe ekonominë. Asgjë nuk është më e çmuar se jeta e njerëzve”, shkruan Basha, por pa marrë në konsideratë kontekstin global të krizës, ku çdokund situata është alarmante.
Rama ia kthen duke i kujtuar se ka në krah një aleate – Kryemadhin – e cila nuk i beson COVID-it, e kështu kontribuon në përhapjen e infeksionit.
“Lulëzim Basha është kapur pas Covidit si i mbyturi pas fijes së barit dhe pretendon se ai do ta kishte ndaluar valën e dytë, ndërkohë që nuk ndalon dot as aleaten e tij në fushatën e saj për përhapjen e Covidit!
Mirë u çmendën po pse të gjithë njëherësh, thoshte Shvjeku i shkretë!”, shkruan i pari i qeverisë në përgjigjen e tij. /tesheshi.com/
