Që Kristiano Ronaldo është bërë një njeri me karakter e që “lufton” për sfidat e tij, një meritë të madhe ka Aleks Ferguson, i cili e stërviti te Mançester Junajted.
Për këtë jep një dëshmi, ish trajneri i Djajve të Kuq, Toni Koton, i cili ka qenë në stafin e Sër Aleks.
Koton rrëfen për mediat britanike se Ferguson nuk i duronte dot simulimet e 18 vjecarit Ronaldo, e veçanërisht, indiferencën e tij për të rimarrë topin. Sër Aleks iu thoshte njerëzve të stafit se portugezi nuk mund të sillej si balerinë, e të rrëzohej në çdo rast, për të mashtruar arbitrat.
Për të ndryshuar situatën, Ferguson porositi stafin të mbyllnin një sy ndaj goditjeve që i jepeshin 18 vjeçarit Ronaldo. Nga ana tjetër, mori veç “senatorët” Roi Kin dhe Rio Ferdinand, e i porositi t’i hynin fort portugezit, sa herë merrte topin. E siç tregon Toni Koton, asnjëri nuk ia përtonte Ronaldos, e shpesh e ngrinin në ajër me shqelma. Dicka e tillë zgjati, e po shihej si portugezi filloi të reagonte, herë duke “iu kthyer reston”, herë duke vrapuar për të kapur topin nga inati.
Në këtë mënyrë, karakteri i tij po forcohej, trupi i tij “e mbante me shumë” goditjen dhe simulimet u pakësuan. Përveç këtyre, personaliteti i adoleshentit gjeni u forcua dhe ai po konturohej si lider, ashtu sic Ferguson e donte. E ndërsa në fillim Ronaldo qante nga trajtimi i keq, më vonë, edhe kur u largua nga Mançester për te Reali i Madridit, e takonte shpesh Fergusonin, e qeshte me të, duke e quajtur një baba të dytë.
Ndaj, shprehja “kush të rreh të do”, mbetet ende brenda aktualitetit, edhe në futboll. /tesheshi.com/
