Në kulmin e kohës së pandemisë së shkaktur nga COVID-19, në vëmëndjen e shqiptarëve, u shfaq para syve të shqiptarëve, fenomeni që të gjithë opinioni publik, gazetarët, njerëzit e biznesit, politikës e administratës e njihnin: personazhi është Ylli Ndroqi, alias Xhemail Pasmaçiu.
Një hetimi disa mujor, SPAK-ut, ia zbriti këmbët në tokë, nga Rolls Rojsi (Rolls- Royce) (Maybach) i tij luksoz që u sekuestrua në vend; bashkë me të një duzinë të tjera pasurish që siç dihet tashmë u vendosën nën administrimin e Agjencisë së Pasurive të Sekuestruara.
Përfshirja në linjat e trafikut të drogës, për të cilat tashmë është dënuar në Turqi dhe Itali, qe një arsye e mirë e sekuetrimit të pronave të këtij subjekti.
Kush ishte, kush është dhe çfarë donte të bëhej Ylli Ndroqi ose Xhemaili (mund ta thërrisni si të doni). “Falë njohjes” së Kuranit, herët në rininë e tij, thuhej se shkruante nuska kundër magjive e magjistarëve, edhe pse në Islam ato janë kategorikisht të ndaluara.
Historia e nuskave dhe e trafikut të drogës në Itali e Turqi stërthuhej kafeneve të Tiranës, aq sa askush s’ndan dot të vërtetën nga legjenda. E ndërsa kjo histori kishte marrë dhenë, pakkush në zyrat e agjencive ligjzbatuese guxonte të shkruante dy gisht letër mbi këtë legjendë.
Fundja mund të jetë shkruar, por “nuskat funksionuan” deri kur RENEA trokiti te dera e Ora-s me vendimin e SPAK-ut në dorë. Pakkush e kishte menduar këtë gjë më parë, e aq më pak e mendonin se mund të ndodhte. Kishte nxënë vend tashmë edhe ideja se kjo “perandori” ka zënë vend, është bërë e ligjshme dhe e shkuara e saj është pastruar.
Pse lindi Ora News?
Nga viti 2007, rrjetet sociale ende nuk kishin nisur betejën e tyre me shtypin e shkruar, por mediat vizive po. Ato thuajse po e fitonin betejën. Gazetat dergjeshin dëshpërimisht tezgave për një blerës. Në këtë kohë, Ilda Priftit, një adoleshente fatlume, “i ra në bingo” licenca e një përçuesi televiziv. Në dhjetor ajo ia shiti median Ylli Ndroqit. Kishte lindur Ora News. Thashethemet ishin se ajo ble 700 mijë euro, por në letra del se u ble për 25 milionë lekë. Naivisht lind pyetja se cila ka qenë vlera e vërtetë e përçuesit pamor (transmetues televiziv) që Ylli Ndroqi (Xhemaili) pagoi?
Transaksionet e saj kurrë nuk dolën në dritë deri sa SPAK-u e Policia iu vunë pas. Por duke kuptuar tashmë historinë e personazhit, letrat e të cilit u hapën nga SPAK-u, lind pyetja: Përse ky personazh i dyshimtë vendosi të blejë dhe të angazhohet në media? Shkoi deri aty sa të merrte guximin të paguante si drejtues një nga gazetarët më të shtrenjtë të kohës dhe duke e bërë drejtorin e informacionit më të paguar në vend në atë kohë. Por reportertët, teknikët, e prapavija, “zezakët e shtypit”, djersinin jo pak për një pagë 300 mijë lekë të vjetra. Nga ana tjetër, pushimet dhe jeta luksoze e çiftit Ndroqi (Pasmaçiu), të rrethuar nga badigardë të panumërt, po habiste dynjanë tek transmetoheshin në ekranin e Ora-s. Ky imazh i këtij personazhi të denjë për sharltanizmin e tij, a kishte moralin dhe qëllim të zbulonte sheshit të vërtetën, duke u shitur sikur po e kërkonte atë si gjilpërën në kashtë?
Po Kush e orientoi Z. Ndroqi, drejt kësaj rruge dhe cilat ishin lidhjet e tij? Po qëllimi? Ka ende shumë gjëra për t’u zbuluar. Por nuk është i ri perceptimi se qelizat e këqia, malinje në mjekësi, zgjedhin fillimisht më të pafajshmet e trupit të njeriut për të depërtuar deri tek ato më të mirat e më të rëndësishmet. Kjo teori ka kohë që praktikohet nga krimi i organizuar. Shqipëria nuk është terreni i parë i këtij eksperimenti.
Shefi i Koza Nostrës (Cosa Nostra) në vitet ‘70 në Amerikë, Karlo Gambino, i veshi vetes imazhin e një njeriu të dashur babaxhan, bamirës e filantrop. Por hetimi i Rudolf Xhulianit me ndihmën e të pendurit Xho Bananas, zbuluan “filantropin” e vërtetë. Filizofia e Koza Nostrës në Itali qe e njëjtë që në fillimet e saj në Sicili. Më tej është i njohur procesi ndaj ish-senatorit e ish-kryeministrit Xhulio Andreoti në Gjykatën e Romës, edhe pse nuk pati sukses. Mos krahasimet janë pak pa vend?! Ylli Ndroqi (Pasmaçiu) dhe Karlo Gambino, apo Ylli dhe Andreoti. Cilido qoftë krahasimi mes tyre, rezultanjta dihet: dëshira për të penetruar në shoqëri si kanceri, për ta marrë dhe për të kontrolluar jetën e njerëzve, sistemin, për ta komanduar atë sipas qëllimit të tyre. Vështirë të besohet se mendja e Xhemailit ishte aq inteligjente në fillim, por duke u përpjekur të ngjitet në hierarkinë e shikueshmërisë televizive, Yllit nisi t’i pëlqente kjo histori. Njihen tashmë kronikat me personazh djalin e Yllit, i cili shkon në shkollë ditën e parë, apo transmetimet e panumërta ku konsulli i Nderit i Meksikës, shtronte teza ekonomike, politike, kulturore dhe të etikës mediatike. Madje në youtube e në tv transmetoheshin kronika për dasmën e djalit të Yllit, apo për për jetë e tij luksoze, i stolisur me këmishat më shtrenjta të kombinuara dhunshëm me kostumet e markave më të mira. Këto transmetoheshin në këtë ekran.
Por cila ishte vlera informative për opinionin? Zero. Po ashtu bodigardët po shtoheshin, por për t’u mbrojtur nga kush? Pse?! Po targat diplomatike? Nga kush donte imunitet ky personazh i çuditshëm?! Nuk shkoi shumë kohë kur nisi të dilte në shesh edhe “konkurrenca” familjare, e po ashtu edhe naiviteti, djallëzia apo korrupsioni në nivelet e larta të administratës, të cilët autorizuan që e gruaja e Yllit të bëhej konsulle nderi e Kosovës në Shqipëri. Sirenat e eskortave luksoze me Mercedezë G, të zinj, ulërinin rrugëve të vendit që konsullit t’i lihej autostrada në dispozicion. Përse demonstrime të tilla force? Çfarë qëllimi kishin? Cilës pjesë së shoqërisë i përkisnin? Këto janë vetëm disa nga pyetjet që dalin nga turma naive dhe e ndershme që çuditet nga subjekte që shkruanin nuska dikur e që sot i kanë zëvendësuar me kravata të bukura të shtrenjta.
Tashmë SPAK-u po merret me këtë personazh aq të njohur në publik dhe me fuqi në opinion e në institucione, por aq të panjohur për pjesën e tij të padukshme. Po lidhjet e tij, me të huajt e çuditshëm që vizitonin Shqipërinë dhe ortakët e tij në biznes a janë hetuar? A kanë dijeni institucionet shqiptare se ç’lidhje ka z. Ndroqi me shtetasin turko-iranianin Abdul Selam Turgut, i akuzuar për trafik ndërkombëtar droge dhe i dyshuar si person i lidhur direkt me shërbimet sekrete iraniane? Turgut dyshohej se ishte pjesë e celulës që do të përgatiste atentate ndaj grupimit të muxhahedinëve në Shqipëri.
Financimi i kësaj celule dyshohej se bëhej nga Irani. Deri këtu nuk të habit asgjë, vetëm të duket vetja në filmat amerikanë, mafie, aksion shërbime sekrete, trafik drogë e para. Këtyre benefiteve iu shtohet edhe lehtësia e të punuarit të këtij grupimi shoqëror me bankat që kanë pare “dëshirën e mirë” të bëjnë biznes, pa asnjë verifikim, mbi origjinën e biznesit, destinacionin e fondeve që kreditoheshin krejtësisht të thata në duart e më pas çantat e bosëve të kësaj mediaje. A duhet bankat të veprojnë në këtë mënyrë? Po Banka e Shqipërisë çfarë bën? Po Agjencia e Parandalimit të Parave çka bërë?
Ylli Ndroqi, “mbetet” tek njerëzit që paguante sa që kanë krijuar një tifozëri që brohorasin për emrin e tij si për të një “zëri të lirë”, duke harruar se ky “zëri i lirë”, ka mbytur zëra të tjerë që mund të kenë qenë më të lirë se ai kohë më parë, kur turku Abul Selam Turgut, braktisi arrestin i shtëpisë që i ishte vendosur nga Gjykata e Apelit të Tiranës. Edhe për këtë rast ka të dhëna se trafikanti që e “përpiu dheu”, ishte miku i konsullit të Meksikës në Shqipëri.
Duke renditur të gjithë këto fakte, pse duhet të kemi frikë që SPAK-u, po vepron me dorë të rëndë ndaj atij që disa e quajnë “Zë i lirë”? Natyrisht pas sekuestrimeve, Meksika, duhet t’i ketë nisur një notë proteste Shqipërisë, e pse jo, ka të drejtë të ndërpresë edhe marrëdhëniet e nderit me ne. Deri sa të dëgjojmë zërin e lirë të radhës le të presim. /tesheshi.com/
