Rënia e lindshmërisë, vjen edhe nga zhvillimi e jo domosdoshmërisht nga varfëria, siç ne në Shqipëri po gjykojmë kështu, referuar pikërisht konteksteve ekonomike e sociale shqiptare.
Na e thonë këtë vendet e zhvilluara, na e thotë madje dhe Koreja e Jugut e largët, atje ku rënia e lindshmërisë ka shënuar rekord botëror.
Koreja e Jugut është përballur me një rënie të nivelit të lindjeve në vitet e fundit, kryesisht për shkak të rritjes së numrit të të rinjve që shmangin martesën për arsye të ndryshme sociale dhe ekonomike.
Ekspertët atje besojnë se ndryshimet e mëdha ekonomike në vend kanë pasoja për situatën financiare, si dhe pamjen demografike të të gjithë vendit.
Gjatë tre gjeneratave të fundit, Koreja e Jugut ka përjetuar industrializim të shpejtë dhe përparim të jashtëzakonshëm ekonomik dhe sot është ekonomia e katërt më e madhe aziatike, menjëherë pas Kinës, Japonisë dhe Indisë.
Sidoqoftë, vitet e fundit, vendi është përballur me një problem serioz të një popullsie në plakje, një numër në rritje të të rinjve që nuk martohen, si dhe një normë në rënie të lindjeve.
Sipas të dhënave të Kombeve të Bashkuara për vitin 2019, Koreja e Jugut ka nivelin më të ulët të fertilitetit në botë. Në këtë vend aktualisht, mesatarisht, çdo grua lind 1.1 fëmijë.
Për shembull, në Kinë, mesatarisht, çdo grua lindte1.7 fëmijë, në Indi 2.2, në 1.8 SH.B.A., në Gjermani 1.6, dhe në Nigeri deri në 7 fëmijë. Sipas KB, mesatarja globale është rreth 2.5 fëmijë.
Agjencia e Statistikave të Koresë së Jugut tha se ishte veçanërisht shqetësuese të shihte që niveli i pjellorisë së vendit po binte gjatë dekadave të fundit. Në fillim të viteve 50, mesatarisht, çdo grua lindte 5.6 fëmijë, ndërsa kjo shifër ka rënë sot në 1.1.
Zyrtarët e shtetit kanë paralajmëruar se gratë në Korenë e Jugut nuk po lindin mjaftueshëm fëmijë dhe, për të përmirësuar treguesit demografikë është gati të pranojë më shumë migrantë.
Një problem i veçantë është gjithashtu fakti që gjithnjë e më shumë gra të reja në Korenë e Jugut nuk duan aspak të martohen sepse duan të angazhohen në karriera profesionale ose të jetojnë të pavarura.
Në vitin 2015, rreth 23 përqind e grave midis moshës 25 dhe 29 vjeçe ishin të martuara, ndërsa në vitet ’70 ishte rreth 90 përqind.
Sipas vlerësimit të KB, Koreja e Jugut, e cila tani ka një popullsi prej rreth 51.2 milion, do të ketë vetëm rreth 29 milion deri në vitin 2100, sa ç’kishte në 1966. /tesheshi.com/
