Nga Blendi Gashi
Siç dhe qeveria e kësaj legjislature vazhdon ta injorojë organin më të lartë ligjvënës, Kuvendin, pasi nuk u përgjigjet në shumicën e rasteve deputetëve, edhe këta të fundit janë po aq injorues ndaj pyetjeve që u drejtojnë qytetarët te platforma “Vota Ime” e Institutit Demokratik të Kosovës që u lansua në nëntor të 2015-tës.
Gjatë katër muajve të 2018-tës, qytetarët kanë parashtruar gjithsejt 12 pyetje për deputetë të ndryshëm, por vetëm katër prej tyre kanë marrë përgjigje, që i bie vetëm 33%.
Ata që u përgjigjën…
Deputeti më i përgjegjshëm rezulton të jetë aktualisht Daut Haradinaj i AAK-së që është përgjigjur në dy pyetje.
Më 5 prill, një banor nga komuna e Malishevës e ka pyetur si i vlerëson veprimet e kryeministrit Haradinaj për shkarkimet e fundit (drejtorit të AKI-së, Driton Gashi dhe ministrit të Brendshëm, Flamur Sefaj)?
Daut Haradinaj është përgjigjur: “I nderuar qytetar, lidhur me pyetjen tuaj, unë mendoj se ka qenë vendim i domosdoshëm kërkesa për lirim nga detyra e dy zyrtarëve të lartë nga ana e KM. Kjo situatë e krijuar kohëve të fundit kërkon reagim institucional dhe besoj shumë se këto veprime janë të arsyeshme”.
Kurse një qytetar nga Prishtina, më 25 prill ka pyetur Daut Haradinajn nëse mund ta shtyjnë përpara projektligjin për ndërtimet pa leje?
Deputeti i AAK-së është përgjigjur: “Ligji në fjalë është në procedurë dhe shumë shpejt do të marr epilogun e nevojshëm. Unë besoj që në afatin prej 35 ditë do të përfundoj ligji në fjalë”.
Përgjigje qytetarëve u ka kthyer edhe deputeti i LDK-së, Naser Rugova. Ky i fundit është pyetur nga një qytetar nga Prishtina nëse mund të punojë që të ndryshohet mënyra e konkurseve që shpallen nga institucionet publike ku kërkohen deri pesë vite përvojë pune pas diplomimit?
Deputeti Rugova është përgjigjur: “Ky është një problem kronik që nga pas lufta, i cili diskriminon shumë profesionist të fushave. E kam ngritur këtë çështje në një nga seancat parlamentare, pas ngritjes së kësaj çështje nga ana ime, disa organizata studentore kanë filluar nismën legjislative që këtë problem për të rinjët që mbarojnë studimet ta rregullojmë me ligj, jam i kyçur personalisht në këtë iniciativë, uroj ta përmbyllim deri në fund të vitit”.
Përgjigje ndaj kësaj pyetjeje lidhur me konkurset për qytetarin në fjalë ka kthyer edhe ish-vetëvendosësi Faton Topalli, tani deputet i Partisë Socialdemokrate.
Topalli është përgjigjur: “Kushti i përvojës së punës, ashtu siç e thoni edhe ju, është edhe diskriminues edhe në shumicën e rasteve i paarritshëm. Aplikimi i këtij kushti, përjashton nga konkurrenca këdo që ka përfunduar shkollimin dhe dëshiron të hyjë për herë të parë në tregun e punës. Në ekonominë private nuk mund të përcaktojmë se kënd punëson punëdhënësi dhe me cilat kritere, por në institucionet publike ky rregull mund të ndryshohet, së paku për fusha të caktuara ku përvoja e punës nuk shtrohet si kriter, pasi që është përjashtues dhe diskriminues. Unë ju siguroj se do ta trajtoj si temë. Po patët dëshirë mund të ma dërgoni kontaktin privat për t’iu njoftuar më vonë se cilat veprime kam ndërmarr”.
Deputetët që s’bzajnë …
Gjatë katër muajve të këtij viti janë shtatë deputetë që nuk u kanë kthyer përgjigje qytetarëve në pyetjet që kanë bërë online.
Prin deputetja e LDK-së, Vjosa Osmani që njihet si zë aktiv në Kuvend, por që online nuk është tërësisht apatike.
Ajo nuk i ka kthyer përgjigje një qytetareje nga Prishtina që e ka pyetur: cili është roli i saj si kryetare e Komisionit për Punë të Jashtme dhe deputete për të mbikëqyrë ligjet e Ministrisë së Jashtme sa i përket rritjes së profesionalizmit dhe uljes së ndikimit politik e partiak në diplomaci?
Ka neglizhuar edhe një qytetar po nga kryeqyteti që e ka pyetur: sa është bërë në procesin e njohjeve dhe se a është në agjendë krijimi i grupeve miqësore me vendet që ende nuk kanë njohur Kosovën?
Ndërkaq, një qytetar nga Deçani më 12 mars të këtij viti ka parashtruar pyetje lidhur me personat e verbër (si pajisje me libreza si në vendet të rajonit e BE-së dhe lidhur me punësimin e tyre), për katër deputet të partive të ndryshme, Fatmir Kollçakun nga Vetëvendosje, Driton Selmanajn dhe Doruntina Malokun nga LDK dhe Bekim Haxhiun nga PDK, por asnjëri prej tyre nuk ka kthyer përgjigje.
Ish-vetëvendosësja Besa Baftiu, tani deputete e Partisë Socialdemokrate, po më 9 prill është pyetur nga qytetari nga Prishtina lidhur me shpalljen e konkurseve nga institucionet publike, por nuk ka kthyer përgjigje.
Përgjigje nuk ka kthyer as deputetja e PDK-së, Evgjeni Thaçi-Dragusha kur është pyetur me 12 janar të këtij viti nga një qytetar nga Skënderaj se ka a ka naj informacion për lirim nga dogana për familjet e dëshmorëve. /tesheshi.com/
