Rreth një muaj pas fillimit të fluturimeve tregtare midis Izraelit dhe Emirateve të Bashkuara, ankesat nga Abu Dhabi dhe Dubai filluan të vijnë nën pretendimin se disa turistë izraelitë po vidhnin gjithçka që mund të merrej nga dhomat e hoteleve.
Ky fenomen u zbulua shumë shpejt, pavarësisht nga iniciativa e Ministrisë së Punëve të Jashtme të Izraelit për të lëshuar një “kod të sjelljes” i cili përmbante udhëzime mbi “çfarë është e ndaluar dhe e lejueshme” dhe udhëzime për izraelitët se si të veprojnë kur udhëtojnë në Emiratet e Bashkuara Arabe dhe qëndrojnë në hotele dhe vendet e këtij shteti arab të Gjirit.
Ankesat nga Emiratet nuk u morën zyrtarisht, por në fakt mbërritën nga zyrtarë hebrenj dhe agjenci izraelite të udhëtimit. Portali i gazetës izraelite Yedioth Ahronoth citoi fjalët e një sipërmarrësi izraelit të angazhuar në tregti dhe turizëm, i cili tha: “Unë kam vizituar Emiratet e Bashkuara Arabe për shumë vite si pjesë e aktiviteteve të mia të biznesit. Jam shokuar nga sjellja dhe qasja e disa turistëve izraelitë”.
Kontrolli
Biznesmeni izraelit përshkroi detaje në lidhje me vjedhjet e sendeve hoteliere në Emirate, pasi siç tha, ishte dëshmitar i rasteve të tilla në një hotel.
“Muajin e kaluar arrita në hotelin ku qëndroj zakonisht. U ndjeva i tmerruar dhe i turpëruar kur pashë izraelitë në hollin e hotelit, të cilëve iu kontrollonin çantat para se të dilnin, nën dyshimin e sendeve të vjedhura nga dhoma”, tha ai.
Ai vazhdoi të përshkruajë atë që ndodhi në hollin e hotelit ku qëndroi, sesi punonjësit kontrolluan çantat e turistëve izraelitë, duke thënë: “Unë pashë një grup të rinjsh nga çantat e të cilëve dilnin peshqirë dhe enë gatimi të vjedhura. Ajo që pamë në Turqi disa vjet më parë tani po merr hov edhe në Dubai.”
“Një abazhur shumëngjyrësh u gjet në çantën e një gruaje izraelite, çmimi i së cilës nuk i kalon disa dollarë”, shtoi ai.
Gjërat që mungojnë
Detaje rreth ndodhjes së vjedhjeve në hotele gjatë vizitave të turistëve të caktuar izraelitë u konfirmuan për gazetën izraelite dhe nga drejtori i një hoteli me pamje nga Burj Khalifa, i cili ndodhet në zemër të zonës së biznesit.
“Ne presim qindra turistë nga e gjithë bota, por nuk kemi hasur më parë në vjedhje nga dhomat e hotelit”, tha ai.
“Kohët e fundit, ne jemi përballur me turistë izraelitë që vijnë në hotel dhe në ikje fshehin peshqirë, qese kafeje dhe çaji, çarçafë dhe abazhurë,” shtoi menaxheri i hotelit.
I pyetur nga gazeta për të cituar një shembull të vjedhjes nga dhomat e hotelit, ai përmendi rastin e një familjeje izraelite, duke thënë: “Një familje me dy fëmijë u kontrolluan, pasi u zbulua se shumë sende mungonin në dhomë. Punonjësi u shpjegoi atyre se disa gjëra mungonin në dhomën ku po qëndronin, ndaj dhe duhet të hapnin çantat, gjë që i irritoi. Në çantat e tyre u gjetën kuti akulli, varëse rrobash, shtroja dhe peshqirë. Kur u thamë se do të njoftonim policinë, ata vendosën të kthejnë gjërat dhe të kërkojnë falje”.
Imazhi i shëmtuar
Ky fenomen u zbulua pavarësisht nga “kodi i sjelljes” i publikuar nga Ministria e Punëve të Jashtme të Izraelit për të gjithë ata që synojnë të udhëtojnë në Emirate, i cili flet për gjithçka që është e lejuar dhe e ndaluar, si dhe sjelljen e duhur të turistëve izraelitë në hotelet e Emirateve.
Ministri i Jashtëm izraelit Gabi Ashkenazi tha në një seancë qeveritare se “nuk duhet t’i japim në Emirate një imazh të shëmtuar të izraelitëve”.
Të famshmit izraelitë më parë kanë tërhequr vëmendjen për këtë fenomen dhe kanë paralajmëruar për këtë në artikujt e botuar në disa uebfaqe dhe gazeta izraelite. Midis tyre ishte këngëtarja Yasmine Levy, e cila në gazetën Haaretz shkroi nën titullin: “Dubai, ki kujdes! Izraelitët po vijnë “.
Ajo paralajmëroi njerëzit e Emirateve për atë që do të hasin pasi aeroplani të mbërrijë nga aeroporti “Ben Gurion”. Ajo tërhoqi vëmendjen për faktin se turistët izraelitë janë të njohur për vjedhjen e gjithçkaje që shohin në dhomat e hoteleve dhe apartamentet e mobiluara, përfshirë peshqirët, çarçafët, jastëkët, pikturat, abazhuret, madje edhe rubinetat. Jo vetëm kaq, tha ajo, turistët izraelitë pëlqejnë të flasin me zë të lartë, të bëjnë zhurmë, të grinden, pasi ata nuk respektojnë askënd.
Turizmi seksual
Më parë, media izraelite zbuloi se turistët izraelitë po udhëtonin për në Dubai, i cili është përshkruar si “kryeqyteti i shthurjes dhe prostitucionit në botë”.
Sipas vlerësimeve të policisë izraelite, grupet e përfshira në krimin e organizuar nga Tel Aviv dhe qendra e vendit janë të përfshirë në drejtimin e klubeve të prostitucionit në Dubai, së bashku me partnerët lokalë.
Sipas policisë izraelite, bandat e krimit të organizuar nga të dy vendet po kryejnë veprimtari dhe bashkëpunojnë përmes kompanive të rreme që promovojnë shitjen e paketave turistike dhe rekreative nga Izraeli në Emiratet e Bashkuara Arabe.
Paketa përfshin katër netë në Dubai dhe një vizë hyrjeje prej 1,200 dollarë. Shuma nuk përfshin kostot e bordellove, të cilat mund të arrijnë në mes 1 mijë dhe 2 mijë dollarë për person. /tesheshi.com/
