Thatësirat e gjatë dhe përmbytjet e shkaktuara nga një prej fenomeneve më të fuqishme të motit, El Niño që janë regjistruar ndonjëherë, ka lënë gati 100 milionë njerëz në jug të Afrikës, azi dhe Amerikën latine përballë mungesave ushqimore dhe ujit të pijshëm sikundër edhe të ekspozuar ndaj sëmundjeve si virusi Zika. Paralajmërimi vjen nga agjencia ndërkombëtare e ndihmave e Kombeve të Bashkuara dhe qeveritë e vendeve përkatëse.
Të dhënat e reja që vijnë nga programi Botëror për ushqimin i OKB-së tregojnë se 40 milionë njerëz në zonat rurale dhe 9 milionë në qendrat urbane që jetojnë në pjesët e përfshira nga thatësira të Zimbabves, Mozambikut, Afrikës së Jugut, Zambias, Malauit dhe Zvazilandit do të kenë nevojë për mbështetje me ushqime vitin e ardhshëm.
Përveç kësaj, edhe 10 milionë njerëz janë në nevojë ushqimore në Etiopi, dhe 2.8 milionë të tjerë në Guatemala dhe Honduras.
Miliona njerëz të tjerë në Azi dhe në rajonet e Paqësorit tashmë janë përfshirë nga valët e të nxehtit, mungesa e ujit dhe zjarret në pyje, që kur fenomeni El Niño u shfaq në mes të vitit 2015. Për shkak të ndikimit të këtij fenomeni, të korrat do të jenë të pakta në të gjithë botën gjatë vitit 2016.
“Pothuajse 1 milion fëmijë janë në nevojë të ngutshme për trajtimin e kequshqyerjes së rëndë në lindje dhe në jug të Afrikës. Dy vjet me shira të rrëmbyeshëm dhe thatësirë kanë krijuar një nga ciklet më të fuqishme të El Niño në 50 vjet, e kanë vendosur në rrezik jetën e fëmijëve më të pambrojtur”, thotë Leila Gharagozloo-Pakkala, drejtoresha rajonale për Afrikën e Unicef.
“Qeveritë po përgjigjen ndaj situatës me burimet që janë, por bëhet fjalë për një situatë të paprecedent që po rëndohet nga rritja e çmimeve të ushqimit, duke detyruar familjet të zbatojnë masa drastike si reduktimi i vakteve dhe shitja e plaçkave për ushqim”.
Organizatat thonë se El Niño do të ketë një ndikim shkatërrimtar mbi të korrat në Afrikë dhe sigurinë e ushqimit në vitin 2016. Sezoni aktual i shirave deri më tani ka qenë më i thati në 35 vjetët e fundit.
Ndërkaq, sipas organizatës botërore të Shëndetësisë, shirat e dendur që pritet të sjellë El Niño në Peru, Ekuador, Paraguaj dhe në jug të Brazilit do të rrisin përhapjen e virusit Zika. “Mushkonjat aedes aegypti rriten në ujë të ndenjur. Mund të presim vektorë të rinj të përhapjes së virusit për shkak të krijimit të vendeve të përshtatshme për to”, thotë OBSH.
Ndikimet e El Niño që vjen nga një ngrohje natyrale e ujërave të oqeanit Paqësor kanë sjellë më shumë thatësira, përmbytje dhe ciklone më frekuente në gjithë botën në vitet e fundit. Por ngjarjet e këtij viti kanë qenë kulminacion i 35 vjetëve të fundit. Edhe pse pritet që fenomeni të dobësojë ndikimin në gjashtë muajt e ardhshëm, efekti në financa, shëndet dhe jetesën e njerëzve mund të zgjasin edhe dy vjet të tjerë për shkak të të korrave të dështuara dhe përmbytjeve të zgjatura. Përgatiti: Juli Prifti – /tesheshi.com/
