Këto ditë kemi parë që dy ministra të qeverisë Rama kanë dhënë llogari për çështje respektive të dikastereve që mbulojnë, tek komisionet parlamentare respektive: ministrja e Kulturës, Mirela Kumbaro te komisioni i Edukimit dhe Informimit, ndërsa ministri i Jashtëm, Ditmir Bushati, te komisioni i Jashtëm. Kumbaro për monumentet, Bushati për Paktin ri Detar me Greqinë.
Po kë kanë patur përballë nga opozita? Znj.Kumbaro ka patur Albana Vokshin. Kjo e dyta, si në formimin skolastik e si në atë empirik, ku tek e fundit përfshihet dhe profili publik në përfaqsimin politik, deri më sot nuk ka patur asnjë lidhje me fushën e Kulturës në përgjithësi apo monumenteve në veçanti. E diplomuar për Inxhineri e më pas Administrim Publik, emri i saj nuk lidhet asgjëkundi me sferën e menaxhimit kulturor. Aq më pak me atë të monumenteve, ku së paku, do të duhej dhe një pasion qytetar minimal për to, ama i afirmuar në publik, sa për ta përligjur ngritjen e zërit për monumentet. Fakti që je në politikë, nuk do të thotë të mos jesh krejt profan në fusha të caktuara. Në mandatin e parë opozitar pas rënies nga pushteti më 2013-ën, znj. Vokshi iu përkushtua denoncimit të koncensioneve e përgjithësisht problemeve në sektorin shëndetësor. Pati të dhëna se ishte adapte në atë punë. Por ky kalimi tek monumentet apo teatri kombëtar, sikur ia karikaturon profilin politik.
Dalim te politika e Jashtme. Përballë ministrit Bushati, për të folur mbi çështjen më përvëluese, më sensitive, e që kërkon të jesh ekselent në disa fusha – histori, diplomaci, jurispundencë, marrëdhënie ndërkombëtare, si dhe ushtrake – pra përcaktimi i kufijve detarë me Greqinë, ishin Edi Paloka, Tritan Shehu, Klajda Gjosha, Edmond Panariti dhe Rudina Hajdari. A ju thotë gjë emri i Palokës në diplomaci? I diplomuar në Inxhinieri, në afro 25 vite politikë aktive, profili i tij politik nuk jep asnjë të dhënë specialieti. Tritan Shehu njihet si mjek reanimator, por që Berisha i jep të drejtojë Ministrinë e Jashtme pas viteve Serreqi. Ç’prej atëhere, për aq pak sa ushtroi detyrën e kryediplomatit, Shehu ia njeh vetes dhe profilin e njohësit të diplomacisë. Klajda Gjosha, ka një formim shkollor të afërt të diplomacinë, ka studiuar marëdhënie ndërkomnbëtare, por pavarsisht faktin se me status çupërline shkon e emërohet ministre – i duheshin dhe ca vite karrierë në nivele të dyta e të treta në administratë, para se të afirmohej si yll diplomacie – kur vjen fjala për çështje të komplikuara si ajo e “Detit”, është më shumë lësëiste sesa profesioniste. Po Edmond Panariti? Një emër impresionues në Veterinarinë shqiptare, por mjaft fakti se sa qesharak do dukej Ditmir Bushati si anëtar i komisionit të Bujqësisë, për të kuptuar se z. Panariti është gabimisht aty. Ndërsa të tjerët aty janë thjesht numra për momentin.
Kriza e opozitës duhet parë dhe në këtë plan: tek përfaqësimi. Për rastin konkret, Bushati e Kumbaro duan pesha më të rënda përballë, që jo thjesht të bëjnë politikë si qëllim në vetvete, zhurmë për hir të zhurmës, por që dhe të bindin opinionin se vërtet ia thonë në punët e shtetit, aq sa për t’iu besuar pushtet. /tesheshi.com
