Fenerbahçe i ka fituar të tre ndeshjet e para ndaj Maccabi Electra-s, skuadrës kampione të Izraelit në basketboll për meshkuj dhe është kualifikuar për në Final Four, në finalen me katër skuadra që do të zhvillohet muajin e ardhshëm për të përcaktuar fituesin e Euroligës. Pas tonit që i dhanë për vite me radhë skuadrat greke këtij aktiviteti, duket se vendin e tyre e kanë zënë tashmë turqit.
Fenerbahçe Ülker i kishte fituar dy ndeshjet e para në Stamboll, dhe mbrëmë luajti takimin e tretë në Izrael. Koha e rregullt përfundoi në barazim, 65-65, dhe në shtesë turqit fituan 74-75, duke shkruar emrin në historinë e basketbollit europian.
Kjo është hera e dytë që një skuadër turke do të luajë në fazën finale të aktivitetit më të madh europian të basketbollit. E pati bërë këtë Efes Pilsen-i, i njohur sot si Anadolu Efes, në sezonin 1999-2000, duke zënë vendin e tretë në ndeshjet e zhvilluara në Selanik të Greqisë.
Takimet e katër skuadrave më të mira europiane do të luhen në Madrid më 15-17 maj, e Fenerbahçe është njëra prej tyre, ndërsa vijojnë ndeshjet e tjera çerekfinale. /tesheshi.com/
