Të rinjtë në kampet e refugjatëve në Kale dhe në Dunkirk po shfrytëzohen seksualisht e po detyrohen të kryejnë krime nga trafikantët. Faktet i nxjerr në pah një raport i Unicef, organizatës së OKB-së për mbrojtjen e fëmijëve.
Dokumenti që është hartuar mbi bazën e gjashtë muaj intervistimesh në kampe, pikturon një panoramë shqetësuese të abuzimit të minorenëve të pashoqëruar në kampet në veri të Francës. Në të thuhet se fëmijët i nënshtrohen dhunës seksuale nga trafikantët që u premtojnë kalimin drejt Britanisë së Madhe.
Fëmijët në kampe u thanë, gjithashtu, kërkuesve se kishin qenë të detyruar të punonin dhe të kryenin krime të tilla si hapja e dyerve të kamionëve në mënyrë që të rriturit të mund të trafikoheshin përmes Kanalit.
Intervistimet shfaqin qartë traumën që kanë përjetuar fëmijët që mbërrijnë në Europë, eksperiencat e tyre në kampe dhe rreziqet që ndërmarrin për t’u bashkuar me anëtarët e familjes, pavarësisht se për shumë prej tyre ekzistojnë rrugë të sigurta e të ligjshme që mund të ishin përdorur për këtë qëllim.
Ministrja e Brendshme e Britanisë së Madhe, Theresa May pritet të merret ashpërsisht në pyetje nga deputetët në parlament, ndërsa është thirrur të raportojë për progresin e bërë nga qeveria në premtimin e gjurmimit të shpejtë të refugjatëve fëmijë që hyjnë nga Europa në Britani.
Muajin e kaluar, përballë një rebelimi nga vetë deputetët e partisë së tij, kryeministri David Cameron bëri kthesë duke ndryshuar qëndrimin në favor të më shumë mbështetje për fëmijët refugjatë të bllokuar në Europë dhe u zotua të lejojë në vend një numër të papërcaktuar prej tyre, në konsultim me autoritetet lokale. Ai ka premtuar të përshpejtojë bashkimin familjar, por qeveria ka deklaruar se do të duhen disa muaj për të pranuar në vend fëmijët e parë.
Rreth 150 fëmijë në Kale kanë të drejtën të hyjnë në Britaninë e Madhe pasi kanë familjet atje. Kjo shifër bëhet e ditur nga organizatat humanitare që ndijmojnë fëmijët. Ato vlerësojnë se më këto ritme, do të duhet një vit derisa 150 fëmijët në fjalë të ribashkohen me familjet e tyre.
Një numër fëmijësh sirianë që kanë gjetur së fundmi strehë në Britaninë e Madhe përmes politikës së bashkimit familjar, kanë shkruar një letër të hapur ku apelojnë ministren e Brendshme të “nxjerrë shokët tanë nga rreziku”.
Në letrën e mbështetur nga Unicef, fëmijët e përshkruajnë veten si me fat. Ata thonë se nuk do të harrojnë kurrë “muajt e tmerrshëm” të kaluar në veri të Francës apo miqtë që kanë lënë pas.
Letra apelon May të punësojë më shumë staf në mënyrë që 150 fëmijët e mbetur në Francë të mund të sillen në Britani pranë familjeve e të nisin shkollën në vjeshtë.
Një numër liderësh fetarë, mes të cilëve edhe arkipeshkvi i Kantërberit kanë apeluar qeverinë të lejojnë 300 nga fëmijët refugjatë më të prekur nga qëndrimi pa prindër në vend të huaj. Ata thonë se pranimi i tyre duhet bërë në kohë që të mund të nisin shkollën në shtator. Fëmijët e pashoqëruar në Kale nuk kanë shkuar në shkollë për gati tre vjet.
Zyrtarë të UNICEF thanë se çështjet e këtyre fëmijëve janë duke u proceduar shumë ngadalë. Sipas tyre, është koha që qeveria britanike t’i kthejë premtimet në vepra dhe të bashkojë këta fëmijë me familjet e tyre.
“Fëmijët në Kale janë rastet më të afërta dhe më të dukshme të fëmijëve që po i largohen konflikteve dhe po bëjnë udhëtimet e rrezikshme në kërkim të sigurisë, por që ende nuk po gjejnë të drejtën ligjore për të jetuar në siguri me familjet e tyre”, thonë ata.
Në muajin e kaluar më shumë se 100 mijë persona, mes të cilëve yje të famshëm të artit e kinemasë, mbështetën fushatën e UNICEF për të shpejtuar procesin e bashkimit të fëmijëve të pashoqëruar në Europë me familjet e tyre në Britaninë e Madhe dhe në zgjerimin e ligjeve të emigracionit për të lejuar fëmijët të qëndrojnë me anëtarë edhe më të largët të familjes që mund të kujdesen për ta.
Përgatiti: Juli Prifti – /tesheshi.com/
