Numri i madh i fëmijëve obez në Komunën e Prishtinës, kryesisht në qytet, po mbetet mjaft i madh dhe shqetësues.
Kështu u tha gjatë publikimit të rezultateve, pas vizitave që u janë bërë nxënësve të klasave të para, të katërta dhe të nënta të kryeqytetit.
Kryetari i Prishtinës, Shpend Ahmeti u shpreh se identifikimi i hershëm i anomalive, posaçërisht i organeve është tejet i rëndësishme për jetëgjatësinë dhe shëndetin e fëmijëve.
Ai ka rekomanduar edhe komunat e tjera që të aplikojnë këto vizita të rregullta.
Drejtori për Shëndetësi dhe Mirëqenie Sociale, Arben Vitia ka vlerësuar punën e doktorëve të cilët kanë kryer kontrollet e fëmijëve për katër vite radhazi, ku janë identifikuar dhjetëra raste të anomalive.
Doktor Nexhmedin Hoti ka vlerësuar punën sistematike që po bëhet në shkollat e Komunës së Prishtinës, si një punë shumë specifike e cila mundëson identifikimin dhe trajtimin e atyre fëmijëve që kanë anomali.
“Këto vite na kanë dalë si problem mbipesha te fëmijët, gjë që është shumë shqetësuese”, tha ai.
Edhe doktoresha Teuta Hoxha ka thënë se nga 51 shkolla, mbetet shqetësues numri i fëmijëve që janë obezë.
“60 përqind e fëmijëve, të cilët kanë një peshë të tepruar në fëmijëri, do e kenë edhe në moshat e rritura. Duke ditur se obeziteti është faktor që shkakton shumë sëmundje, më mirë është të parandalohet se sa të shërohet”, tha ajo. /tesheshi.com/
