“Maqedonia ishte fëmija problematik i Ballkanit, ndërsa tani qeveria e re kërkon të demokratizojë vendin. Por kjo është një detyrë e vështirë që gjithmonë duhet të përllogaritet me shtetin fqinj, Greqinë”, shkruan “Der Spiegel”.
Kriza qeveritare e Maqedonisë? Kjo nuk vlen më. Me ish-kryeministrin Nikola Gruevski që kontrolloi shtetin nga 2006 deri në mes të këtij viti, Maqedonia gjithmonë e më shumë shkonte drejt autoritarizmit dhe nacionalizmit.
Falsifikime zgjedhore, afera korruptive dhe skenarë për konflikte etnike mes maqedonasve dhe shqiptarëve, ishin disa nga dukuritë e krizës së rëndë shtetërore në tre vitet e fundit dhe shumë herë konflikte të dhunshme.
Sipas autorit Keno Verseck, i cili ka intervistuar ministrin e jashtëm Nikola Dimitrov, qeveria e re në 100 ditët e ardhshme ka arritur të reformojë vendin.
“Pritjet dhe shpresat e shoqërisë maqedonase janë shumë të larta,” tha ministri i jashtëm Nikola Dimitrov gjatë bisedës, duke shtuar se “kemi fituar shansin e dytë, për të krijuar një shtet të vërtetë të demokracisë europiane. Këtë mundësi duhet ta shfrytëzojmë”.
Kryeministri Zoran Zaev ka detyra të vështira, mes të cilave: të zgjidh konfliktet me shtetet fqinje, kërkesat e shqiptarëve, të mbrohet nga sulmet e nacionalistëve maqedonas dhe të gjejë rrugëdalje nga varfëria ekonomike dhe problemet sociale.
Media gjermane thekson se problemi bazë i zhvillimit të Maqedonisë si shtet është konteksti i emrit me Greqinë, që daton nga pavarësia në 1991.
Ky konflikt ka bllokuar anëtarësimin e Maqedonisë në NATO dhe avancimin në bisedimet me BE. Qeveria e Gruevskit filloi ndërtimin arkitektonik të Shkupit, sipas një arti antik të Disneyland dhe si një sulm frontal kundër Greqisë.
Ministri i jashtëm grek Kotzias vizitoi në mes të javës së kaluar Shkupin dhe kjo tregon se qeveria e ardhshme është e gatshme për kompromis.
“Por nga ne nuk mund të pritet që të japim shpirtin dhe dinjitetin tonë,” tha ministri i jashtëm maqedonas Dimitrov, duke nënkuptuar se ata do mbesin maqedonas.
Ai shton se është mjaft e rrezikshme të bllokohet një vend, siç po ndodh me Maqedoninë.
Zaevi në një kohë rekord ka nënshkruar një marrëveshje bashkëpunimi me Bullgarinë dhe në të ardhmen pritet edhe takim i dy kabineteve qeveritare mes Maqedonisë dhe Shqipërisë.
Megjithatë kompromisi më i vështirë është me Greqinë dhe për zgjidhjen e këtij konteksti nuk është optimist as politologu grek, Ioannis Armakolas nga Universiteti i “Makedonien” në Selanik.
Ai kujton rastin kur ekipi grek i të rejave në hendboll, refuzoi të luante me koleget e tyre në Shkup, pasi në fanellat e tyre shkruhej “Macedonia”. Në Athinë kjo u duartrokit dhe presidenti grek Prokopis Pavlopoulos i cilësoi vajzat greke si heroina. /tesheshi.com/
