Ahmed Davabsha u mbijetoi plagëve pas zjarrit të vënë shtëpisë së tij nga kolonët hebrenj në korrikun e e vitit të shkuar. Flakët e zjarrit të qëllimshëm në fshatin Duma, në Bregun Perëndimor, i morën jetën aty për aty vëllait të tij të vogël, Aliut, një vjeç e gjysmë. Një javë më vonë do të ndërronte jetë babai i Ahmedit, ndërsa nëna do të vdiste pas një muaji.
Pesëvjeçari do të qëndronte për tetë muaj nën mbikëqyrjen e mjekëve në spital, ndërsa djegiet e rënda i kanë kufizuar lëvizshmërinë.
Një fotografi e tij në spital me një bluzë të Realit të Madridit do të nxiste një fushatë për ta bindur klubin
spanjoll ta priste Ahmedin e vogël në ambientet e tij. Dhe kërkesa u pranua që në janar, për të nisur më pas përgatitjet për udhëtimin e të voglit.
Së bashku me ungjin e gjyshërit, Ahmedi kaloi dje kufirin për në Jordani, e sot ka fluturuar nga Amani drejt Madridit. Vizita në kryeqytetin spanjoll do të zgjasë tre ditë. Ahmedi do të takojë Kristiano Ronaldon më 18 mars, e më pas do të kthehet në spital për të vazhduar trajtimin.
Ai do të vizitojë klubin me famë botërore, e po ashtu stadiumin “Santiago Bernabeu”.
Drejtuesi i federatës palestineze të futbollit, Xhibril Rexhub, nuk harron të falënderojë dhe trajnerin e Realit të Madridit, francezin Zinedine Zidane, për ndihmën e tij në organizimin e takimit. /tesheshi.com/
