Australian Open, Grand Slam-i i parë i vitit, i është afruar fundit. Luhen sot e nesër finalet e meshkujve dhe femrave, me një të veçantë të tyre.
Venus e Serena Williams, njëra 36 e tjetra 35 vjeç, Federer e Nadal, njëri 35 vjeç e tjetri mbi të 30-tat. Eshtë hera e parë në historinë e tenisit modern që të katër finalistët e një turneu Grand Slam të jenë të tërë mbi 30 vjeç!
Dy gjysmëfinalet e meshkujve patën të njëjtin rezultat, 3-2, por ajo e djeshmja mes Rafa Nadal-it dhe
bullgarit Grigor Dimitrov ka qenë krejt e veçantë. Një ndeshje pesorëshe, rraskapitëse, me dy sete me të vendosura me tiebreak. Shihni rezultatin në favor të Nadal-it sa i ngushtë ka qenë: 6-3, 5-7, 7-6, 6-7, 6-4! Fenomenale!
E të mendosh që dy finalistët vijnë nga një vit i mbushur me dëmtime, me periudha të gjata pa luajtur, në përtëritje të formës fizike!
“Kurrë nuk e kam ëndërruar se do të jem në një tjetër finale, jam aq me fat!”
Janë fjalët e Rafa Nadal-it, që kthehet të luajë në nivele të larta pas shumë kohësh.
Nadal e Federer do të takohen për herë të 22-të në një finale tenisi. Spanjolli është në epërsi, me 14 përballje të fituara, por që, në fund të fundit, pak do të kenë ndikim në këtë finale. Të dy e kanë fituar trofeun e Australian Open-it, por ndryshe Federer-it, Nadal e ka bërë vetëm një herë të tijin.
Dhe, në fund, Nadal tregohet vërtet kampion: “Do të jetë shumë e veçantë për të dy të kthehemi këtu. Jam i lumtur për veten time, jam i lumtur njëlloj për të!” /tesheshi.com/
