Prindërit e futbollistit serb që ka pranuar të luajë për Under-19 të Kosovës, Ilija Iviç, thuhet se janë përjashtuar nga puna.
Djaloshi serb është pjesë e ekpit të Flamurtarit të Prishtinës, e një ditë më parë, nga ky klub, u bë me dije se ai do jetë dhe pjesë e përfaqsueseve të Kosovës, duke startuar fillimisht me ata të moshës 19 vjeç.
Eshtë Komiteti Ekzekutiv i Federatës së Futbollit të Kosovës që ka reaguar, duke e quajtur këtë zhvillim negativ në familjen e Iviçit si “akt qyqar”.
“KE i FFK-së e dënon ashpër këtë akt qyqar të ndërmarrë nga drejtues të institucioneve që funksionojnë brenda sistemit të Republikës së Kosovës, por edhe të atyre të sistemit paralel serb, e që për qëllim kanë futjen e frikës tek bashkëqytetarët tanë serb, të cilët e shohin Kosovën si vendin e tyre dhe që duan të kontribuojnë në zhvillimin dhe ngritjen e saj edhe në futboll”, thuhet në deklaratë.
Komiteti pretendon se nëna e futbollistit Iviç ka punuar si nëpunëse civile në Komunën e Graçanicës, e babai i tij është arsimtar, që të dy të përjashtuar nga puna. /tesheshi.com/
