Autoritetet federale amerikane kanë njoftuar për arrestimin e tre personave të akuzuar për tentativë të vendosjes së një bombe në periferi të Kansas City.
Tom Beall, Prokuror i Përgjithshëm, tha se tre burra ishin bërë gati për një akt terrorist. Sipas tij, të arrestuari kishin planifikuar të vendosnin një bombë në një zonë banimi ku jetojnë dhe falin namazin disa familje emigrantësh somalezë.
Tre meshkuj, të identifikuar si Curtis Allen 49-vjeçar, Gavin Ëright 49-vjeçar dhe Patrick Stein 47-vjeçar janë arrestuar në vendin e quajtur Liberal, ku ata jetojnë dhe punojnë.
Beall tha se ky grup i vogël i lëvizjes së krahut të djathtë paramilitar i takon një formacioni të quajtur The Crusaders – Kryqtarët.
Sipas hetuesve federalë, ata kishin planifikuar të aktivizojnë bombën më 9 nëntor, në mënyrë që të mos pengojnë zgjedhjet presidenciale të SHBA, të planifikuara një ditë më parë.
Nihad Awad, drejtor ekzekutiv i Këshillit për Marrëdhëniet Amerikano-Islame (CAIR), tha se këtë mjedis anti-musliman në vend e ka krijuar nga krahu i djathtë i Partisë Republikane dhe kandidati presidencial i kësaj partie, Donald Trump.
“Deklarimet e tij të vazhdueshme raciste kundër muslimanëve kanë krijuar një atmosferë të urrejtjes dhe fanatizmit ndaj muslimanëve gjatë fushatës zgjedhore. Fjalët e tij po inkurajojnë grupet terroriste për të kryer sulme ndaj anëtarëve të komunitetit tonë”, shtoi ai.
Beall theksoi se hetimi i FBI zbuloi “një mendësi thellësisht të fshehtë të urrejtjes dhe të dhunës”.
Byroja Federale e Hetimeve, FBI ka nisur hetimin tetë muaj më parë.
“Këta individë kishin qëllimin, mjetet dhe mundësitë, dhe ata ishin të vendosur për të kryer këtë akt terrorist të brendshëm”, tha Eric Jackson, një agjent special i FBI-së i ngarkuar me këtë rast.
Sipas hetimeve të Byrosë, grupi ‘Kryqtarët’ kishin një rezervë eksplozivësh dhe armësh që do t’i përdornin një ditë pas zgjedhjeve dhe kanë publikuar një “manifest” për planet e tyre.
Hetuesit kanë cituar një anëtar të grupit i cili ka thënë se pas shpërthimit, “njerëzit do të zgjohen.” /tesheshi.com/
