Nga Blendi Gashi
Si asnjëherë më parë takimit e së mërkurës “kokë më kokë” në Bruksel dy presidentët Thaçi e Vuçiç e kanë cilësuar si më të vështirin në gjashtë vitetet e fundit, ndërsa kanë paralajmëruar se edhe takimet e radhës do jenë të tilla.
Përkundër kësaj ata njëzëri pajtohen se dialogu duhet të vazhdojë deri në arritjen e një marrëveshje finale, që aktualisht nuk shihet se është në horizont gjithnjë duke parë kundërshtitë mes palëve.
Por pyetja shtrohet se a e thanë të vërtetën se ç’biseduan në takimin e fundit Thaçi e Vuçiç apo ata me deklarimet për “takimet e vështira” po duan të përgatitin qytetarët e dy vendeve për kompromiset e mundshme që mund të bëhen? Kompromisin me ngulm e kërkon Vuçiç i cili thotë qartë thotë se veç njëra pale s’mund të dale fituese.
Por ja si i shohin analistët politikë “takimet e vështira” mes dy presidentëve…
Politologu Mentor Tahiri, vlerëson se deklaratat e dy presidentëve janë tentim për të përgatitur opinionin dhe ato do të jenë gjithnjë e më të parashikueshme.
“Në anën tjetër, vetë bisedimet po zhvillohen me një mungesë të plotë të transparencës, gjë që është e pritshme për shkak se ndërmjetësuesit perendimorë i frikësohen vendimmarjeve në shkallë të gjerë, rrjedhimisht me këtë çdo gjë është koncentruar në figurat e dy presidentëve. Posaçërisht bie në sy, vetë shpeshtimi i deklaratave. Kjo do të ketë efektin e krijimit të ‘monotonisë’ dhe mosinteresimit nga ana e qytetarëve, e që në praktikë rezulton si mënjanim taktik i presionit qytetar”, thotë Tahiri për tesheshi.com.
Analisti politik, Leon Duhanaj, thotë se shumë marrëveshje me karakter teknik, nuk kanë gjetur zbatueshmëri, shkaku i kalkulimeve politike, sidomos nga ana e Serbisë.
Sipas tij pala serbe e ka shfrytëzuar mirë paaftësinë dhe mosgatishmërinë e palës kosovare për të ndërtuar shtet të mirëfilltë pasi përmes eksponentëve të saj po e shantazhon procesin e shtetndërtimit të Kosovës duke kërkuar edhe më shumë.
“Sipas të gjitha gjasave, Asociacioni do të jetë kompromisi i radhës nga pala kosovare. Por, këtu duhet me pas parasysh dhe shumë kujdes Statutin mbi të cilin do të operojë. Serbia me siguri do të kërkoj ndarje territoresh. Këtë nuk do duhet ta pranonin as shqiptarët por as faktori ndërkombëtarë. Një Kosovë e ndarë, do të nënkuptonte tradhti ndaj gjakut të rënë për liri, sepse ndarja do te arrihej edhe pa luftë”, thotë Duhanaj.
Gurakuç Kuçi, analist politik thotë se synimet e Serbisë janë të ditura, për Veriun autonomi dhe bisedime për komunat tjera.
“Ka presion që Asociacioni të bëhet sipas marrëveshjes së Brukselit dhe jo Kushtetutës së Kosovës. Është normale që Serbia të thotë të dyja palët të humbin por realisht pjesë humbëse do jetë Kosova që mund të lëshoj hapësirë në sovranitetin e saj”, thotë Kuçi për tesheshi.com.
Kujtojmë se Bashkimi Evropian ka paralajmëruar se takimi i radhës mes dy presidentëve do zhvillohet javëve në vazhdim por nuk ka cekur një datë të saktë. /tesheshi.com/
