Rishfaqja e Fatos Nanos në një takim që ai ka pasur në Kryeministri me Edi Ramën, po komentohet gjerësisht nga politikanë e media. Por, vetë Nano e ka ruajtur qetësinë e nuk ka mohuar e as pohuar një takim të tillë. Një portal online njoftoi dje per takimin Nano-Rama e i pyetur për këtë takim, Nano thjesht ka ironizuar pak mediat.
“Ky është lajm serioz, por kur paska filluar media shqiptare të merret me gjëra serioze…?!”, iu përgjigj Nano interesimit të gazetës “Panorama” për këtë takim.
Në takimin, që sipas lapsi.al është i sigurtë se ka ndodhur në katin e dytë të Kryeministrisë, mendohet se është folur për një mbështetje ose qëndrim asnjëanës të ish-liderit të socialistëve në momentin e një shkëputjeje të mundshme të koalicionit me LSI-në. Rama duket se ka dashur të mbrojë krahët brenda partisë, ndërsa në vjeshtë ka gjasa të përballet me probleme me aleaten më të vogël të Qeverisë, LSI-në. /tesheshi.com/
