Fatmir Xhafaj deklaroi sot nga salla e Kuvendit rihapjen e hetimeve për disa ngjarje të vjetra, shumë sensitive dhe vrasjes të bujshme ende të pazbuluara.
Në fjalën e mbajtur si ministër i Brendshëm i drejtoi një apel strukturave të hetimit të krimit për t´u përgatitur që të japin të gjithë kontributin e tyre në këtë drejtim.
Nuk dihet se sa seriozisht do të merret kjo deklaratë e Xhafajt, referuar faktin se çdo ministër i Brendshëm të njëjtën gjë ka premtuar kur ka marrë detyrën dhe kur e ka lënë nuk ka zbuluar asnjë prej krimeve, që kanë tronditur opinionin.
“Tashmë është momenti për t’i dhënë jetë këtij procesi në praktikë, përmes mbështetjes maksimale të ngritjes së Byrosë Kombëtare të Hetimit dhe Prokurorisë Speciale, si dhe ndërtimit të një bashkëpunimi shumë më efikas me to, për të pasur rezultate të prekshme në luftën kundër krimit të organizuar dhe korrupsionit të nivelit të lartë.
Strukturat e Policisë së Shtetit për hetimin e krimit do të duhet të përgatiten për të dhënë të gjithë kontributin e tyre ligjor mbështetës në këtë aspekt, përfshirë edhe hapjen e disa çështjeve sensitive në vite për opinionin publik të lidhur me disa vrasje të bujshme ende të pa zbuluara”, tha ai. /tesheshi.com/
