Kryenegociatori i Reformës në Drejtësi, pionieri i preferuar i Enverit, do të ulet në krah të Ramës si ministër i Rendit. Si arriti të fitonte besimin e kryetarit të ri një prej “xhaketave të vjetra” të PS-së?!
Fatmir Xhafa ka qenë në Partinë Socialiste që kur kjo parti quhej Partia e Punës dhe para se të bëhej pjesë e saj ishte një ndër të rinjtë e projektuar për t’u bërë udhëheqës i shtetit komunist. Fotoja e tij në krah të diktatorit Enver Hoxha e tregon qartë këtë fakt. Ai ka shërbyer si ministër Drejtësie në kohën e Fatos Nanos, por pas ardhjes së Edi Ramës në krye të partisë do të kishte vështirësi në mbajtjen e një pozicioni me ndikim ashtu si gjithë kolegët e tij të tjetër që Rama i grupoi si “xhaketat e vjetra”. Shumica nga grupi i të të vjetërve u larguan fare nga partia, duke u spastruar nga listat e deputetëve në zgjedhjet që pasuan, u larguan nga drejtimi i saj, nuk u bënë ministra dhe nuk u promovuan publikisht dhe politikisht.
Xhafaj ishte një përjashtim.
Ai bëri “hasha” Nanon fill pas ardhjes së Ramës në parti dhe tentoi të ishte i dobishëm me ekspertizën e tij si jurist i zoti pa kërkuar kurrë më shumë dhe pse duhet të jetë ndjerë keq kur ka parë të bëhen ministra të tjerë me shumë më pak bagazh profesional e jetësor dhe kontribut politik se ai.
Pak nga pak Xhafaj arriti të riforconte pozicionin e tij pranë Ramës, nga ‘i dobishëm” në “i dosmosdoshëm” me nisjen e Reformës në Drejtësi. Rama duhet të ketë menduar se kishte ku të gjente një njeri më të përgatirur brenda grupit të deputetëve, ku gjysma e kishin diplomën e juridikut sa për figurë, gjysma ishin biznesmenë dhe siç rezultoi një pjesë e mirë dolën me të shkuar kriminale.
Pra Xhafa kishte staturën dhe eksperiencën e duhur për t’u bërë krye-arkitekti i kësaj reforme duke drejtuar Komisionin e Posaçëm Parlamentar të ngritur për këtë qëllim.
Pikërisht arritja e kësaj reformemesa duketështë arsyeja që sot Rama vendosi ta bëjë ministër të Rendit në vend të Sajmir Tahirit. Është i vetmi i “xhaketave të vjetra” socialiste që Rama i beson një post ministri, në një kabinet ku janë të gjithë të besuarit e tij, shumica të ardhur në Partinë Socialiste bashkë me të.
Me vendosjen e tij ministër Rama mund t’i ketë dhënë më shumë forcë “klanit Veliaj” nëse ekziston një i tillë, siç përflitet në korridoret e socialistëve përplasja për influencë Tahiri-Veliaj. Do të mbahet mend mea-kulpa e tij në krah të kryetarit aktual të bashkisë, kur pranonte gabimet e qeverisjes “Nano” dhe i jepte të drejtë protestave të “Mjaft”-it, organizata e drejtuar nga Veliaj.“Ne ikëm në atë kohë se kishim bërë disa gabime.
Do të thotë se ata djem dhe vajza kishin të drejtë. Por ne nuk i dëgjuam,” tha Xhafaj në krah të Veliajt duke bërë avokatin për të, kur socialistët e thjeshtë e fajësonin Mjaftin si faktor në rrëzimin e PS-së nga pushteti në 2005-ën.
Por nëse Rama ka menduar se do të qetësojë edhe opozitën me zgjedhjen e Xhafajt, e ka gabim. Ai është po aq i atakuar nga opozita saç ishte dhe Tahiri.
Kur Xhafaj negocionte reformën në drejtësi opozita deklaronte se vëllai i tij kërkohet për trafik ndërkombëtar droge.
“Kërkesa e Gjykatës së Lartë të Venezuelës për grupin ndërkombëtar të trafikut të drogës, ku protagonist është Agron Xhafaj, vëllai i Fatmir Xhafës, zbulon dhe motivin pse kërkohej patjetër kapja e drejtësisë dhe e institucioneve kryesore të pushtetit të tretë.
Pse kërkohej me cdo kusht që gjyqtarët e prokurorët të ishin nën urdhërat e kupolës së Rama-Xhafaj, në mënyrë që të pastrohen dosjet e krimit, dosjet e drogës.Ky vendim gjykate sqaron pozicionin e vëllait të kryetarit të komisionit për reformën në drejtësi, një pozicion kyc në bandën e trafikut ndërkombëtar të drogës me aktivitet në Itali, Shqipëri, SHBA, Kanada dhe Poloni.”- akuzonte PD-ja disa muaj më parë.
Me zgjedhjen e Fatmir Xhafës në krye të një prej ministrive më të rëndësishme Rama vetëm sa ka forcuar pozitat e tij në prag të zgjedhjeve dhe duke emëruar një njeri të regjur në politikë dhe një njohës të taktikave elektorale, vetëm më pak “showman” se sa Tahiri… por kujt i intereson spektaklti në raport me fitoren e zgjedhjeve të ardhshme?! /tesheshi.com/
